Kamus-ı Muhit - اللافظة maddesi

اَللاَّفِظَةُ [el-lâfiżat] Deryâya ıtlâk olunur, içinde olanı taşra attığı için ve harf-i taʹrîfsiz maʹrife yaʹnî ʹalem olarak لاَفِظَةٌ [lâfiżat] dahi ıtlâk olunur; yukâlu: رَكِبَ اللاَّفِظَةَ وَلاَفِظَةَ أَيِ الْبَحْرَ Ve

لاَفِظَةٌ [lâfiżat] Horoza ıtlâk olunur, dâneleri minkârıyla devşirip kendisi ekl eylemeyip tavuğun ağzına ilkâ eylediği için. Ve yavrusunu ağzıyla yemleyen kuşa ıtlâk olunur, zîrâ dâneyi kursağından çıkarıp yavrusunun ağzına ilkâ eder. Ve şol koyuna ıtlâk olunur ki geviş getirip dururken sağmaya çağrıldıkta ağzından gevişini atıp neşâtla sağılmaya gelir ola. Ve değirmene ıtlâk olunur, remy-i dakîk eylediği için. Emsâlden “أَسْمَحُ مِنْ لاَفِظَةٍ” kavlindeki لاَفِظَةٌ [lâfiżat]tan maʹânî-i mezkûrenin her biri murâd olur. Ve

لاَفِظَةٌ [lâfiżat] Dünyâya ıtlâk olunur, içinde olanı âhirete tarh eylediği için.

Vankulu Lugatı - اللافظة maddesi

اَللَّافِظَةُ [el-lâfiżat] (fâ’nın kesriyle) Bir nesneyi ağızdan atıcı kimse. Ve ʹArabların “أَسْمَحُ مِنْ لَافِظَةٍ” dediği kavllerinde لَافِظَةٌ [lâfiżat]den murâd baʹzılar eyitti: Keçidir; zîrâ keçi gevişin geverken sağmağa daʹvet ettiklerinde ağzından gevişin bırakıp safâyla sağalmağa teveccüh eder. Ve baʹzılar eyitti: لَافِظَةٌ [lâfiżat]tan murâd şol yavrulu kuştur ki bâtınında olan gıdâsın çıkarıp yavrusuna itʹâm eder. Ve baʹzılar eyitti: لَافِظَةٌ [lâfiżat]tan murâd değirmendir. Ve baʹzılar eyitti: لَافِظَةٌ [lâfiżat]tan murâd horozdur ki dâneyi ağzına almış iken bırakıp refîklerine îsâr eder. Baʹzılar لَافِظَةٌ [lâfiżat]dan murâd deryâdır dedi, ʹanberi ve cevâhiri attığından ötürü. Pes لَافِظَةٌ [lâfiżat]ta olan hâ mübâlaga için olur.