خِنْدِفُ [Ḣindif] (زِبْرِجٌ [zibric] vezninde) Leylâ bint Ḣulvân b. ʹİmrân nâm hatunun lakabıdır ki İlyâs b. Muḋar’ın zevcesi idi. Firâşından ʹAmr ve ʹÂmir ve ʹUmeyr nâm oğulları hâsıl olmuştur. Bir gün İlyâs develerini otlağa götürüp raʹy ederken develer bir tavşandan ürküp etrâf ve eknâfa perâkende oldular. Hemân ʹAmr haymeden hurûc edip o tavşanın arkasından şitâbân oldu. Bir mikdâr gittikten sonra tavşana idrâk eylemekle onu مُدْرِكَةُ [mudriket] ile telkîb eyledi. Ve ʹÂmir dahi ʹAmr’ın ensesinden bile seğirtmekle o tavşanı sayd ve tabh eylediğinden طَابِخَةُ [ṯabiḣat] ile mülakkab oldu. Ve ʹUmeyr çıkmayıp haymede inkımâʹ ve inzivâ eylemekle قَمَعَةُ [ḵamaʹat] ile mülakkab oldu. Ve vâlideleri dahi enselerinden çıkıp sürʹatle seğirttikte İlyâs nereye خَنْدَفَةٌ [ḣandefet] edersin diye su΄âl eylemekle ʹakibinizden ben dahi böylece خَنْدَفَةٌ [ḣandefet] ile geldim dediğinden خِنْدِفُ [ḣindif] ile telkîb olundu. Ve Ḩuseyn b. Meymûn el-Ḣindifî rüvâttandır. Ve Muḩammed b. ʹAbdulġanî el-Ḣindifî beyne’l-muhaddisîn sâhib-i zikrdir.
Sitemizde detaylı hızlı ve kolay arama ekranı