Kamus-ı Muhit - البرة maddesi

اَلْبَرَّةُ [el-berret] (bâ’nın fethiyle) Birr ve ihsân maʹnâsından ismdir, niteki zikr olundu. Ve bir mevziʹ adıdır ki onda Ḵâbîl, Hâbîl’i katl eyledi. Ve

بَرَّةُ [berret] Zemzem suyunun ismidir; kesret-i menâfiʹi sebebiyle tesmiye olunmuştur. Ve Berre bint ʹAbdulmuṯṯalib, ʹammetü’n-Nebiyyi ʹaleyhi’s-selâmdır. Ve Şeyḣ Muʹâž b. Muʹâž olan Rebîʹin pederi İbrâhîm b. Muḩammed eṡ-Ṡanʹânî ceddinin ismidir. Ve Yemâme’de iki karye adıdır, birine Berre-i ʹUlyâ ve birine Berre-i Suflâ derler. Ve

بَرَّةُ [Berret] Bir recül adıdır.

اَلْبُرَةُ [el-buret] (bâ’nın zammıyla ثُبَةٌ [šamp;ubet] vezninde) Halhâla denir; cemʹi بُرَاتٌ [burât] ve بُرِينَ [burîn] gelir bâ’ların zammıyla ve بِرِينَ [birîn] gelir bâ’nın kesriyle; yukâlu: جَاءَتْ وَفِي رِجْلِهَا بُرَةٌ أَيْ خَلْخَالٌ Ve devenin burnuna yâhûd burnunun etine geçirilen halkaya denir ki burunsalık taʹbîr olunur; yukâlu: جَعَلَ بِأَنْفِ الْجَمَلِ بُرَةً وَهِيَ حَلْقَةٌ فِي أَنْفِهِ أَوْ فِي لَحْمَةِ أَنْفِهِ Ve bunun aslı بُرْوَةٌ [burvet]tir, عُرْوَةٌ [ʹurvet] gibi.

Vankulu Lugatı - البرة maddesi

اَلْبُرَّةُ [el-burret] (kezâlik bâ’nın zammıyla) Vâhidi. Ve Sîbeveyhi eyitti: بُرٌّ [burr] أَبْرَارٌ [ebrâr] vezni üzere cemʹ olunmak câ΄iz değildir. Ve Muberred câ΄izdir dedi, kıyâsa binâ΄en.

اَلْبَرَّةُ [el-berret] (bâ’nın fethiyle) Mutîʹa olan ʹavret; yukâlu: اَلْأُمُّ بَرَّةٌ بِوَلَدِهَا

اَلْبُرَةُ [el-buret] (bâ’nın zammı ve râ’nın tahfîfiyle) Şol bakır halkadır ki devenin burnu ortasına takarlar. Ve Aṡmaʹî eyitti: Şol halkadır ki burnunun bir cânibine takarlar. Ve Aṡmaʹî eyitti: Gâh olur بُرَةٌ [buret]i kıldan dahi ederler, kılı büküp devenin burnuna geçirmekle ki ona خِزَامَةٌ [ḣizâmet] dahi derler ḣâ ve zâ-yı muʹcemeteynle. Ve Ebû ʹAlî eyitti: بُرَةٌ [buret]in aslı بَرْوَةٌ [bervet]tir, zîrâ cemʹi اَلْبُرَى [el-burâ] gelir bâ’nın zammı ve elifin kasrıyla,قَرْيَةٌ [ḵaryet] ile قُرَى [ḵurâ] gibi Nüsah-ı Cevherî’de vâkiʹ olan budur lâkin temsîl عُرْوَةٌ [ʹurvet] ile عُرَى [ʹurâ] gibi dese evlâ ve enseb olurdu. Ve عُرْوَةٌ [ʹurvet] bir nesnenin kulpuna derler. Ve her halkaya بُرَةٌ [buret] derler gerek bilezik halkası gerek küpe halkası gerek halhâl halkası olsun.