Kamus-ı Muhit - القتل maddesi

اَلْقُتْلُ [el-ḵutl] (ḵâf’ın zammıyla) ve

اَلْقُتُلُ [el-ḵutul] (zammeteynle) قَتُولٌ [ḵatûl]un cemʹidir ki صَبُورٌ [ṡabûr] veznindedir, kesîrü’l-katl adama denir; yukâlu: هُوَ قَتُولٌ وَهُمْ قُتْلٌ وَقُتُلٌ أَيِ الْكَثِيرُ الْقَتْلِ

اَلْقِتْلُ [el-ḵitl] (ḵâf’ın kesriyle) Katl bâbında dilîr ve mâhir düşman mukâtile denir; cemʹi أَقْتَالٌ [aḵtâl] gelir; yukâlu: هُوَ قِتْلٌ أَيْ عَدُوٌّ مُقَاتِلٌ Ve sadîk dosta denmekle zıdd olur; yukâlu: هُوَ قِتْلُهُ أَيْ صَدِيقُهُ Ve bir nesnenin misl ve nazîrine denir; yukâlu: مَا لَهُ قِتْلٌ أَيْ نَظِيرٌ Ve bir adamın ʹamuca-zâdesine denir; tekûlu: هُوَ قِتْلِي أَيِ ابْنُ عَمِّي Ve bahâdır ve dilâvere denir; yukâlu: رَجُلٌ قِتْلٌ أَيْ شُجَاعٌ Ve cenkte bir adamın hemtâsına denir; yukâlu: قَتَلَ قِتْلَهُ أَيْ قِرْنَهُ Ve şerr ve şûr husûsunu hoşça bilir olan kimseye denir; yukâlu: إِنَّهُ لَقِتْلُ شَرٍّ أَيْ عَالِمٌ بِهِ

اَلْقَتْلُ [el-ḵatl] (ḵâf’ın fethi ve tâ’nın sükûnuyla) ve

اَلتَّقْتَالُ [et-taḵtâl] (تَذْكَارٌ [težkâr] vezninde) Öldürmek maʹnâsınadır; yukâlu: قَتَلَهُ وَقَتَلَ بِهِ قَتْلًا وَتَقْتَالًا إِذَا أَمَاتَهُ Burada bâ΄ harfiyle قَتَلَ بِهِ ʹunvânı Šaʹleb’den mervîdir. Şârih der ki قَتْلٌ [ḵatl] cesed-i hayvândan izâle-i rûh eylemek maʹnâsına mevzûʹdur ki mütevellî ve mübâşir fiʹline makrûndur. Ve eğer fevt-i hayât ile iʹtibâr olunursa ona مَوْتٌ [mevt] denir. İntehâ. Ve

قَتْلٌ [ḵatl] Bir nesneye gereği gibi muttaliʹ olup bilmek maʹnâsına müstaʹmeldir, gûyâ ki cehli قَتْلٌ [ḵatl] eder; yukâlu: قَتَلَ الشَّيْءَ خُبْرًا إِذَا عَلِمَهُ يَعْنِي عِلْمًا تَامًّا Ve meşrûb yufkaca olmak için su katmak maʹnâsına müstaʹmeldir; yukâlu: قَتَلَ الشَّرَابَ إِذَا مَزَجَهُ بِالْمَاءِ Ve laʹn ve nefrîn eylemek maʹnâsınadır; ve minhu kavluhu taʹâlâ:﴿قُتِلَ الْإِنْسَانُ مَا أَكْفَرَهُ﴾ أَيْ لُعِنَ

Vankulu Lugatı - القتل maddesi

اَلْقِتْلُ [el-ḵitl] (ḵâf’ın kesri ve tâ’nın sükûnuyla) ʹAdüvv maʹnâsına. Ve

قِتْلٌ [ḵitl] Bir nesnenin misline dahi derler; yukâlu: هُمَا قِتْلَانِ أَيْ مِثْلَانِ

اَلْقَتْلُ [el-ḵatl] (ḵâf’ın fethi ve tâ’nın sükûnuyla) Öldürmek.