قُدُّوسٌ [Ḵuddûs] (zammeteynle ve dâl’ın teşdîdiyle) Bârî taʹâlânın ism-i şerîflerindendir. Ve bu فُعُّولٌ [fuʹʹûl]dur, قُدْسٌ [ḵuds]ten tahâret maʹnâsına. Ve Sîbeveyhi: قَدُّوسٌ ve سَبُّوحٌ der idi evvellerin fethiyle, nitekim ذُرُّوحٌ [žurrûḩ] beyân olunduğu mahalde mürûr etti. Ve Šaʹleb eyitti: Her ism ki فَعُّولٌ [faʹʹûl] vezni üzeredir, ʹayn’ın teşdîdiyle onun evveli meftûhtur, سَفُّودٌ [seffûd] ve كَلُّوبٌ [kellûb] ve سَمُّورٌ [semmûr] ve تَنُّورٌ [tennûr] ve شَبُّوطٌ [şebbûṯ] illâ سُبُّوحٌ [subbûḩ]la قُدُّوسٌ [ḵuddûs] ki bunların evvelinde zamm ekserdir fethten ve eyitti: ذُرُّوحٌ [žurrûḩ]ta dahi zamm ekserdir ve az olur meftûh dahi olur. Ve سَفُّودٌ [seffûd] sîn-i mühmele ve fâ ile ve dâl-ı mühmele ile şîş dedikleri demir ki onunla kebâb pişirirler. Ve شَبُّوطٌ [şebbûṯ] şîn-i muʹceme ve ṯâ-i mühmele ile bir nevʹ balıktır.
Sitemizde detaylı hızlı ve kolay arama ekranı