Kamus-ı Muhit - المنقع maddesi

اَلْمَنْقَعُ [el-menḵaʹ] (مَجْمَعٌ [mecmaʹ] vezninde) Deryâya ıtlâk olunur. Ve su irkilen yere denir.

اَلْمِنْقَعَةُ [el-minḵaʹat] (مِكْنَسَةٌ [mikneset] vezninde) ve

اَلْمَنْقَعَةُ [el-menḵaʹat] (مَرْحَلَةٌ [merḩalet] vezninde ki bu Kurâʹ-ı Lugâvî naklîdir) ve

اَلْمُنْقُعُ [el-munḵuʹ] (مُنْخُلٌ [munḣul] vezninde) Şol küçük çömleğe denir ki içinde hurmâyı süte ıslatıp etfâle yedirirler.

اَلْمِنْقَعُ [el-minḵaʹ] ve

اَلْمِنْقَعَةُ [el-minḵaʹat] (mîm’in kesriyle) Devâ makûlesi nesne ıslatılan kaba denir. Ve

مِنْقَعُ الْبُرَمِ [minḵaʹu’l-burem] Çömlek vazʹ eyledikleri zarfa denir. Ve

مُنْقَعُ الْبُرَمِ [munḵaʹu’l-burem] (ki مُكْرَمٌ [mukrem] veznindedir) Küpe ıtlâk olunur, دَنٌّ [denn] maʹnâsına. Ve çömlekte kalan fazla ve bakiyyeye denir. Ve taştan düzülmüş küçük tâsa ve maşrabaya denir. Ve çözülüp yeniden eğrilmiş ipliğe denir ki ʹavretler onu eğirdikten sonra koyacak sâ΄ir kabı olmamakla çömlek içre vazʹ eder. Ve

مُنْقَعٌ [Munḵaʹ] (مُكْرَمٌ [mukrem] vezninde) Temîmî ve sahâbîdir, pederine ve sâ΄ire mensûb değildir ve bunun ḵâf’ını teşdîd galattır yâhûd İbnu’l-Ḩuṡayn b. Yezîd’dir. Ve Munḵaʹ b. Mâlik zamân-ı saʹâdette vefât eylemekle mazhar-ı terahhüm-i ʹâlîleri olmuştur. Ve

مُنْقَعٌ [munḵaʹ] Bir kab içre ıslatılmış nesneye denir. Ve tebrîd olunmuş hâlis süte denir. Ve terbiye olunmuş zehre denir; yukâlu: سَمٌّ مُنْقَعٌ أَيْ مُرَبًّى

Vankulu Lugatı - المنقع maddesi

اَلْمُنْقَعُ [el-munḵaʹ] (mîm’in zammı ve nûn’un sükûnu ve ḵâf’ın fethiyle) Suda ıslanan nesne gerek devâ gerek onun gayrı. Ve terbiye olunan zehre dahi derler; yukâlu: سَمٌّ مُنْقَعٌ أَيْ مُرَبًّى

اَلْمَنْقَعُ [el-menḵaʹ] (mîm’in ve ḵâf’ın fethiyle) Şol yerdir ki onda su eğlene.

اَلْمِنْقَعُ [el-minḵaʹ] (mîm’in kesri ve ḵâf’ın fethi ile) Şol kaptır ki نَقُوعٌ [neḵûʹ] onun içinde ıslatıla. Ve

مِنْقَعُ الْبُرَمِ [minḵaʹu’l-burem] Şol çanaktır ki çömlek toprağından yapılmış ola.