Kamus-ı Muhit - الغضبة maddesi

اَلْغَضْبَةُ [el-ġaḋbet] (تَمْرَةٌ [temret] vezninde) Bu dahi sulb ve saht olan yalçın kayaya denir. Ve yaşlı geyik ve dağ keçisinin derisine denir. Ve ʹArabların deve derisinden düzdükleri kalkana denir. Ve baʹzı gözün üst kapağında olan hılkî yumruca etçeğize denir ki kapakları şiş hey΄etinde görünür. Ve balık derisine ve başın derisine denir. Ve öküzün boynuzları aralığında olan deriye denir.

اَلْغَضَبُ [el-ġaḋab] (fethateynle) ve

اَلْمَغْضَبَةُ [el-maġḋabat] (mîm’in ve ḋâd’ın fethiyle) Darılmak ve hışma gelmek maʹnâsınadır; yukâlu: غَضِبَ عَلَيْهِ وَغَضِبَ لَهُ أَيْ غَضِبَ عَلَى غَيْرِهِ مِنْ أَجْلِهِ غَضَبًا وَمَغْضَبَةً مِنَ الْبَابِ الرَّابِعِ إِذَا كَانَ حَيًّا وَيُقَالُ غَضِبَ بِهِ إِذَا كَانَ مَيِّتًا Mü΄ellif gerçi كَسَمِعَ ʹunvânıyla temsîl eylemiştir. lâkin Baṡâ΄ir’de ve ümmehât-ı sâ΄irede فَرِحَvezninde masûg olmakla onlara iktidâ olundu. Ve

غَضِبٌ [ġaḋib] (كَتِفٌ [ketif] vezninde) ve

اَلْغَضُوبُ [el-ġaḋûb] (صَبُورٌ [ṡabûr] vezninde) ve

اَلْغَضْبُ [el-ġaḋb] (شَكْسٌ [şeks] vezninde) ve

اَلْغُضُبُّ [el-ġuḋubb] (عُتُلٌّ [ʹutull] vezninde) ve

اَلْغُضُبَّةُ [el-ġuḋubbet] (عُتُلَّةٌ [ʹutullet] vezninde) ve

اَلْغَضُبَّةُ [el-ġaḋubbet] (ġayn’ın fethi ve ḋâd’ın zammıyla) ve

اَلْغَضَبَّةُ [el-ġaḋabbat] (fetehâtla ve işbu dört ahîrede dahi bâ-yı muvahhadenin teşdîdiyle) ve

اَلْغَضْبَانُ [el-ġaḋbân] (سَكْرَانُ [sekrân] vezninde) Bi’t-tabʹ dargın, hışm-nâk adama denir. Ve zikr olunan sîgaların mü΄ennesinde غَضْبَى [ġaḋbâ] denir, سَكْرَى [sekrâ] vezninde ve غَضُوبٌ [ġaḋûb] denir, müzekkeri gibi ve غَضْبَانَةٌ [ġaḋbânet] denir hâ’yla kıllet üzere. Ve cemʹlerinde غِضَابٌ [ġiḋâb] denir, ġayn’ın kesriyle ve غَضَابَى [ġadâbâ] denir, نَدَامَى [nedâmâ] vezninde ve bunda ġayn’ın zammıyla da câ΄izdir; şârihin beyânı üzere belki ġayn’ın zammı ekserdir. Ve

غَضْبَانُ [Ġaḋbân] سَكْرَانُ [sekrân] vezninde Şâm’da bir dağın adıdır. Ve

غَضْبَى [Ġaḋbâ] سَكْرَى [sekrâ] vezninde Ḣayberî b. el-Ḩuṡayn nâm kimsenin feresi ismidir.

Vankulu Lugatı - الغضبة maddesi

اَلْغُضُبَّةُ [el-ġuḋubbet] (ġayn’ın ve ḋâd’ın zammıyla ve bâ’nın teşdîdiyle) Serîʹü’l-gazab olan kimse; yukâlu: رَجُلٌ غُضُبَّةٌ أَيْ يَغْضَبُ سَرِيعًا