إِبْرَهَمُ [İbrehem] (elifsiz hâ’nın fethiyle ki yedi lügat olur) Musaggarında بُرَيْهٌ [Bureyh] denir, زُبَيْرٌ [zubeyr] vezninde hemzenin ve mîm’in tarhıyla, ʹalâ-kavlin أُبَيْرِهٌ [Ubeyrih] denir, سَفَرْجَلٌ [sefercel]de سُفَيْرِجٌ [sufeyric] dedikleri gibi ve ʹinde’l-baʹz بُرَيْهِيمٌ [Bureyhîm] denir, hemzesini zâ΄id tevehhüm eylemiştir. Ve cemʹi أَبَارِهُ [Ebârih] ve أَبَارِيهُ [Ebârîh] ve أَبَارِهَةُ [Ebârihet] ve بَرَاهِمُ [Berâhim] ve بَرَاهِيمُ [Berâhîm] ve بَرَاهِمَةُ [Berâhimet] ve بِرَاهٌ [Birâh] gelir mîm’siz. Mü΄ellifin Baṡâ΄ir’de beyânına göre İbrâhîm Ḣalîlu’r-Raḩmân ʹalâ-nebiyyinâ ve ʹaleyhi’s-selâm hazretlerinin ism-i şerîfidir, lafz-ı Süryânîdir, أَبٌ [eb] ile رَاهِيمٌ [râhîm] lafzından mürekkebdir ki أَبٌ رَحِيمٌ demektir; arz-ı ʹIrâḵ’tan Bâbil vilâyetinden Kûšamp;â nâm kasabada tevellüd eyledi, Ġûṯa-i Dimaşḵ kurâlarından Berze nâm karyeye nisbeti onda mütemekkin olduğuna mebnîdir.
Sitemizde detaylı hızlı ve kolay arama ekranı