اَلْهَيُولَى [el-heyûlâ] (hâ’nın fethi ve yâ’nın zammı ve elifin kasrıyla ve İbn Ḵaṯṯâʹ nakli üzere yâ-yı mazmûmenin teşdîdiyle de câ΄izdir) Pamuğa denir, قُطْنٌ [ḵuṯn] maʹnâsına. Evâ΄il yaʹnî hukemâ-i selef tînet-i ʹâleme bi’t-teşbîh هَيُولَى [heyûlâ] ıtlâk eylediler. Pamuk asl envâʹ-ı siyâb olduğu gibi sirişt-i ʹâlem dahi asl envâʹ-ı suver-i kevniyyedir. Ve ʹinde’l-baʹz ıstılâh-ı felâsifede bir mevsûftur ki ehl-i tevhîdin zât-ı baht-ı ilâhîyi tavsîf eyledikleri sıfatlarıyla muttasıftır, yaʹnî kemmiyyet ve keyfiyyetsiz ve ona simât-ı hudûstan bir ʹalâmet mukterin olmayarak bir mevcûddan ʹibârettir, baʹdehu ona sanʹat-ı sâniʹ-i bî-çûn hulûl ve ʹarazlar iʹtirâz eylemekle ondan işbu ʹâlem-i kevn ü fesâd hâdis oldu. Hulâsası suver-i cinsiyye vü nevʹiyyeye kâbil mâddeden mücerred bir cevherdir.
Sitemizde detaylı hızlı ve kolay arama ekranı