Kamus-ı Muhit - جمل maddesi

جُمَلُ [Cumel] (صُرَدٌ [ṡurad] vezninde) İbn Vehb’dir ki Benû Sâme cemâʹati nesebindendir.

جُمْلُ [Cuml] (قُفْلٌ [ḵufl] vezninde) Bir ʹavretin ismidir.

اَلْجَمَلُ [el-cemel] (fethateynle) Erkek deveye denir ki zikr olundu. Ve hurmâ ağacına denir. Ve bir cins deniz balığına denir ki tûlü otuz endâze mikdârında olur ve bu جَمَلُ الْبَحْرِ [cemelu’l-baḩr] dedikleridir. Ve

جَمَلٌ [Cemel] Esâmîdendir: Cemel b. Saʹd, Mežḩic kabîlesinden bir cemâʹatin pederidir; tâbiʹînden Hind b. ʹAmr el-Cemelî onlara mensûbdur.

اَلْجُمَّلُ [el-cummel] (سُكَّرٌ [sukker] vezninde) ve

اَلْجُمَلُ [el-cumel] (صُرَدٌ [ṡurad] vezninde) ve

اَلْجُمْلُ [el-cuml] (قُفْلٌ [ḵufl] vezninde) ve

اَلْجُمُلُ [el-cumul] (عُنُقٌ [ʹunuḵ] vezninde) ve

اَلْجَمَلُ [el-cemel] (جَبَلٌ [cebel] vezninde) Gemi ipine denir ki murâd iri halatıdır, komana taʹbîr olunur. Ve kuri΄e bihinne kavluhu taʹâlâ: ﴿حَتَّى يَلِجَ الْجَمَلُ فِي سَمِّ الْخِيَاطِ﴾ الآية Ve

جُمَّلٌ [cummel] (سُكَّرٌ [sukker] vezninde ve tahfîfle câ΄izdir) Hisâb-ı cümele denir ki أَبِيجَادٌ [ebîcâd] hurûf-ı mukattaʹasıdır. Her biri bir ʹadede dâldır, târîh hisâb ederler.

Vankulu Lugatı - جمل maddesi

جُمْلٌ [Cuml] (cîm’in zammı ve mîm’in sükûnuyla) Bir ʹavretin ismidir.

جَمَلٌ [Cemel] (fethateynle) Mežḩic’den bir kabîlenin babası adıdır ki o Cemel b. Saʹdu’l-ʹAşîre’dir ki Hind b. ʹAmr el-Cemelî onlardandır ki Emîrü’l-mü΄minîn ʹAlî ile bile idi, katl olundu.

اَلْجُمَّلُ [el-cummel] (cîm’in zammı ve mîm’in fethi ve teşdîdiyle) Bir nevʹ hisâb. Ve

جُمَّلٌ [cummel] Gemi ipine dahi derler, habl-i sefîne maʹnâsına. Ve o şol iplerdir ki bir kaçın bir yere getirip bağlarlar. Ve İbn ʹAbbâs radıyallâhu ʹanhumâ: “حَتَّى يَلِجَ الْجُمَّلُ فِي سَمِّ الْخِيَاطِ” (الأعراف، 40) kırâ΄at etti.