زَكَرِيَّا [Zekeriyyâ] (zâ’nın ve kâf’ın fethi ve râ’nın kesri ve yâ’nın teşdîdiyle) Peygamberlerden birinin ismidir, salavâtullâhi ʹaleyhim. Ve bunda üç lügat vardır: biri elif-i memdûde ve biri elif-i maksûre ve biri dahi elifi hazf etmektir. Eger elif-i memdûde ve elif-i maksûre ile olursa lâ-yansarıf olur ve eger elif hazf olunursa munsarıf olur. Ve memdûdun tesniyesi زَكَرِيَّاوَانِ gelir ve cemʹi زَكَرِيَّاوُونَ gelir vâv’la ve زَكَرِيَّاوِينَ gelir hâlet-i cerrde ve nasbda ve nisbette زَكَرِيَّاوِيٌّ gelir ve kaçan nefsine izâfet etsen زَكَرِيَّائِي dersin bilâ-vâv, nitekim حَمْرَائِي dersin حَمْرَاءُ [ḩamrâ΄]ın izâfetinde ve izâfetin tesniyesinde زَكَرِيَّاوَايَ dersin vâv’la, zîrâ hâlet-i inkıtâʹında زَكَرِيَّاوَانِ dersin ve cemʹinde زَكَرِيَّاوِيَّ dersin vâv’ın kesriyle bunda refʹ ve cerr ve nasb berâber olur, مُسْلِمِيَّ de ve زَيْدِيَّ de berâber olduğu gibi. Ve maksûrun tesniyesinde زَكَرِيَّيَانِ dersin زَكَرِيَّا nın elifin ictimâʹ-ı sâkineynden ötürü tahrîk edip yâ’ya kalb etmekle ve hâlet-i nasbda رَأَيْتُ زَكَرِيَّيْنِ dersin ve cemʹinde هَؤُلَاءِ زَكَرِيُّونَ dersin elifi hazf etmekle ictimâʹ-ı sâkineynden ötürü ve tahrîk etmezsin zîrâ tahrîk etsen mazmûm etmeli olursun yâhûd mazmûm olmaz ve meksûr dahi olmaz mâ-kabli müteharrik olıcak pes bu ecldendir ki tesniyeye muhâlif oldu.
Sitemizde detaylı hızlı ve kolay arama ekranı