Kamus-ı Muhit - عرم maddesi

اَلْعَرَمُ [el-ʹarem] (fethateynle) Kemik ve biryân makûlesinin râyihası yayılmak maʹnâsınadır; yukâlu: عَرِمَ الْعَظْمُ عَرَمًا مِنَ الْبَابِ الرَّابِعِ إِذَا قَتِرَ Ve

عَرَمٌ [ʹarem] Bir nesnede olan aklı karalı alacalığa denir, ʹalâ-kavlin aklı karalı hurde hurde benekliliğe denir. Ve koyun kısmının dudağında olan aklığa denir, عُرْمَةٌ [ʹurmet] dahi denir, ke-mâ se-yuzkeru. Ve

عَرَمٌ [ʹarem] Ete denir, لَحْمٌ [laḩm] maʹnâsına.

اَلْأَعْرَمُ [el-aʹrem] (أَحْمَرُ [aḩmer] vezninde) عُرْمَةٌ [ʹurmet]li koyuna denir; mü΄ennesi عَرْمَاءُ [ʹarmâ΄]dır; yukâlu: ضَأْنٌ أَعْرَمُ وَنَعْجَةٌ عَرْمَاءُ إِذَا كَانَ بِهِ عُرْمَةٌ Cemʹi عُرْمٌ [ʹurm] gelir ʹayn’ın zammıyla. Ve

عُرْمٌ [ʹurm] Bağırtlak kuşunun yumurtalarına denir, aklı karalı hurde hurde benekli olduğu için. Ve

أَعْرَمُ [aʹrem] Mutlakan iki renkli nesneye denir. Ve abraş hayvâna denir. Ve koyun ile keçi karışık sürüye denir. Ve hitânsız adama denir; cemʹi عِرْمَانٌ [ʹirmân]dır ʹayn’ın kesriyle ve cemʹü’l-cemʹi عَرَامِينُ [ʹarâmîn]dir.

اَلْعَرْمُ [el-ʹarm] (ʹayn’ın fethiyle) Kemiğin etini soymak maʹnâsınadır; yukâlu: عَرَمَ الْعَظْمَ عَرْمًا مِنَ الْبَابِ الْأَوَّلِ وَالثَّانِي إِذَا نَزَعَ مَا عَلَيْهِ مِنْ لَحْمٍ Ve meme emmek maʹnâsınadır; yukâlu: عَرَمَ الصَّبِيُّ أُمَّهُ إِذَا رَضَعَهَا Ve deve ağaç dallarını otlayıp kemirmek maʹnâsınadır; yukâlu: عَرَمَتِ الْإِبِلُ الشَّجَرَ إِذَا نَالَتْ مِنْهُ Ve bir adama küstâhâne bed muʹâmele eylemek maʹnâsınadır; yukâlu: عَرَمَ فُلَانًا إِذَا أَصَابَهُ بِشَرَاسَةٍ Ve

عَرْمٌ [ʹarm] Yağlılığa denir; yukâlu: فِيهِ عَرْمٌ أَيْ دَسَمٌ Ve çömlek içre kalan bakiyyeye denir.

Vankulu Lugatı - عرم maddesi

اَلْعَرْمُ [el-ʹarm] (ʹayn’ın fethi ve râ’nın sükûnuyla) Kemik kemirmek; tekûlu: عَرَمْتُ الْعَظْمَ أَعْرُمُهُ وَأَعْرِمُهُ عَرْمًا مِنَ الْبَابِ الْأَوَّلِ والثاني إِذَا عَرَقْتَهُ Ve عَرْقٌ [ʹarḵ] kemikten eti almağa derler. Ve

عَرْمٌ [ʹarm] Deve ağacı otlamağa dahi derler; yukâlu: عَرَمَتِ الْإِبِلُ الشَّجَرَ أَيْ نَالَتْ مِنْهُ