شَوَّالٌ [Şevvâl] (شَدَّادٌ [şeddâd] vezninde) Merv kazâsında bir karyedir. Ve şehr-i fıtr ismidir ki bayram ayıdır; cemʹinde شَوَاوِيلُ [şevâvîl] ve شَوَّالَاتٌ [şevvâlât] denir. Şârihin beyânına göre nâkaların شَوْلٌ [şevl]-i eznâbı o mâha müsâdif olduğu bâʹis-i ıtlâk olmuştur. Ve sâhib-i Miṡbâḩ’ın beyânına göre شَوَّالٌ [şevvâl] kelimesine baʹzen harf-i taʹrîf dâhil olur, zâhiren عَبَّاسٌ [ʹabbâs] kelimesi gibi, vasfiyyet-i asliyye lemhine mebnî olur, zîrâ kütüb-i nahviyyede mansûstur ki esmâ-i şühûr aʹlâm-ı cinsiyye bâbındandır, hattâ شَعْبَانُ [şaʹbân] ve رَمَضَانُ [ramaḋân] kelimelerinin ʹadem-i insirâfının bir sebebi ʹalemiyyettir. Bu cihetle sâhib-i Telvîḩ’in فَخْرُ الْإِسْلَامِ ʹibâresinden رَجَب kelimesi ʹalemiyyet ve muʹarref bi’l-lâm olan اَلرَّجَبُ kelimesinden ʹadl ʹilletleriyle gayr-i munsarıftır diye nakline iʹtirâz eylemişlerdir lâkin اَلْحَسَنُ gibi اَلرَّجَبُ lafzında dahi lemh-i vasfiyyete kâ΄il olsalar ne mâniʹ vardır, vech-i mezkûr üzere hilâf-ı kıyâstan elbette evlâdır. Ve esâmî-i şühûra dâ΄ir baʹzı nefâyis مُحَرَّمٌ mâddesinde resm olunur, inşâ΄allâhu taʹâlâ. Ve Sâlim b. Şevvâl tâbiʹîndendir. Ve ʹAbde bint Ebî Şevvâl, Râbiʹa el-ʹAdeviyye cenâblarından rivâyet-i hadîs eylemiştir.
Sitemizde detaylı hızlı ve kolay arama ekranı