Kamus-ı Muhit - المجنة maddesi

اَلْمَجَنَّةُ [el-mecennet] (mîm’in ve cîm’in fethiyle) Tâ΄ife-i cinn makarrı arza denir; yukâlu: أَرْضٌ مَجَنَّةٌ أَيْ كَثِيرَةُ الْجِنِّ Ve Mekke kurbünde bir mevziʹ adıdır; baʹzen mîm’i meksûr olur. Ve delilik, جُنُونٌ [cunûn] maʹnâsınadır; yukâlu: بِهِ مَجَنَّةٌ أَيْ جُنُونٌ

اَلْمِجَنُّ [el-micenn] ve

اَلْمِجَنَّةُ [el-micennet] (mîm’lerin kesriyle ve cîm’lerin fethiyle) ve

اَلْجُنَانُ [el-cunân] ve

اَلْجُنَانَةُ [el-cunânet] (cîm’lerin zammıyla) Kalkana denir, تُرْسٌ [turs] maʹnâsına, sâtir olduğu için; ve tekûlu’l-ʹArab: قَلَبَ فُلَانٌ مِجَنَّهُ أَيْ أَسْقَطَ الْحَيَاءَ وَفَعَلَ مَا شَاءَ أَوْ مَلَكَ أَمْرَهُ وَاسْتَبَدَّ بِهِ Yaʹnî “Hayâ΄ ve hicâbı bertaraf edip bî-pervâ dilediğini işler oldu” yâhûd “Zimâm-ı umûru yed-i gayrda iken şimdi hod-be-hod umûrunu kabza-i irâde vü istiklâline aldı” diyecek yerde îrâd olunur. Ve

مِجَنٌّ [micenn] وِشَاحٌ [vişâḩ] maʹnâsınadır ki nisvân-ı ʹArab zînetlerindendir.

Vankulu Lugatı - المجنة maddesi

اَلْمَجَنَّةُ [el-mecennet] (mîm’in ve cîm’in fethiyle) Şol yerder ki onun cinni çoktur, اَرْضٌ ذَاتُ جِنٍّ maʹnâsına. Ve

مَجَنَّةٌ [mecennet] Cünûna dahi derler. Ve

مَجَنَّةٌ [Mecennet] Kezâlik bir mevziʹin ismidir ki Mekke-i müşerrefe’den birkaç mîl ıraktır. Ve İbn ʹAbbâs eyitti: مَجَنَّةٌ [Mecennet] ve ذُو الْمَجْدِ [Žu’l-Mecd] ve عُكَاظٌ [ʹUkâż] şol bâzârlardır ki zamân-ı câhiliyyette mevcûd idi.

اَلْمِجَنَّةُ [el-micennet] (mîm’in kesri ve cîm’in fethiyle) Şol mekândır ki onda gizlenirler.