Kamus-ı Muhit - حزن maddesi

اَلْحَزْنُ [el-ḩazn] (ḩâ’nın fethi ve zâ-yı muʹcemenin sükûnuyla ve fethateynle) Gam ve endûha denir; cemʹi أَحْزَانٌ [aḩzân]dır; yukâlu: أَخَذَهُ حَزْنٌ وَحَزَنٌ أَيْ هَمٌّ Ve ḩâ’nın zammıyla حُزْنٌ [ḩuzn] masdar olur, bir adamı gam-gîn eylemek maʹnâsına; yukâlu: حَزَنَهُ الْأَمْرُ حُزْنًا مِنَ الْبَابِ الْأَوَّلِ إِذَا جَعَلَهُ حَزِينًا Ve

حَزَنٌ [ḩazen] (fethateynle) Kezâlik masdar olur, gam-gîn olmak maʹnâsına; yukâlu: حَزِنَ الرَّجُلُ حَزَنًا مِنَ الْبَابِ الرَّابِعِ إِذَا صَارَ حَزِينًا

اَلْحَزْنُ [el-ḩazn] ve

اَلْحَزْنَةُ [el-ḩaznet] (ḩâ’ların fethi ve zâ’ların sükûnuyla) Sert ve galîz yere denir; yukâlu: أَرْضٌ حَزْنٌ وَحَزْنَةٌ أَيْ غَلِيظَةٌ خِلَافُ سَهْلَةٍ Ve

حَزْنٌ [Ḩazn] Ġassân kabîlesinden bir cemâʹattır. Ve bilâd-ı ʹAraba ıtlâk olunur ki ʹArabistân taʹbîr olunur, ʹalâ-kavlin bilâd-ı ʹArabda iki حَزْنٌ [Ḩazn] nâm mahall vardır, biri Zubâle ile Necd beyninde olan arzdır ve biri Benî Yerbûʹ yurdunda bir mevziʹdir ki düz ovaları ve niçe merg-zârları müştemildir; ve minhu kavluhum: مَنْ تَرَبَّعَ الْحَزْنَ وَتَشَتَّى الصَّمَّانَ وَتَقَيَّظَ الشَّرَفَ فَقَطْ أَخْصَبَ Yaʹnî “Bir adam bahâr mevsiminde Ḩazn ve kış faslında Ṡammân ve yaz eyyâmında Şeref nâm mahallerde ârâm eylese aslâ cedb ve kılletten âzürde olmayıp hısb ve rehâ ile imrâr-ı eyyâm eder.” Ve Ḩazn b. Ebî Vehb ashâbdandır.

Vankulu Lugatı - حزن maddesi

اَلْحَزْنُ [el-ḩazn] (ḩâ’nın fethi ve zâ’nın sükûnuyla) Galîz olan yer. Ve

حَزْنٌ [ḩazn] ʹAraba mensûb olan şehrler, bilâd-ı ʹArab maʹnâsına. Ve bir kabîlenin dahi ismidir Ġassân’dan.