اَلصَّفَرِيَّةُ [eṡ-ṡaferiyyet] (fetehâtla) Güz mevsiminin evâ΄ilinde biten nebâtlara denir, ʹalâ-kavlin harâret-i havânın çekilip bürûdetin bi’t-tedrîc gelmeğe başladığı hengâmda nâbit olanlara denir yâhûd evvel-i ezmineye yaʹnî her mevsimin evâ΄iline denir ki ibtidâ ayının müddetidir, meselâ yazın ve güzün ibtidâ ayları gibi. Ve
صَفَرِيَّةٌ [ṡaferiyyet] Koyun ve keçi kısmının Süheyl yıldızı tulûʹu vaktinde doğurdukları döllere ıtlâk olunur ki evvel-i mevsim-i şitâ΄ olur.
اَلصُّفْرِيَّةُ [eṡ-ṡufriyyet] (ṡâd’ın zammıyla) Yemen diyârına mahsûs bir gûne hurmâ ismidir, henüz بُسْرٌ [busr] iken kurutup sevîk içre şeker yerine vazʹ ederler. Ve
صُفْرِيَّةٌ [Ṡufriyyet] (ṡâd’ın zammı ve kesriyle) Ḩarûriyye tâ΄ifesinden bir fırkaya ıtlâk olunur. ʹAbdullâh b. Ṡaffâr yâhûd Ziyâd b. el-Aṡfer nâm re΄îslerine mensûblardır yâhûd benizleri sarı olmakla sarıya nisbet olundular yâhûd dîn ve şerîʹatten hâlî oldukları için ıtlâk olundu. Bu خُلُوٌّ [ḣuluvv] maʹnâsından me΄hûzdur. Ve Mehâlibe cemâʹâti ki kerem ve semâhatle müştehirlerdir, onlara da Ṡufriyyet ıtlâk olunur, cedleri olan Ebû Ṡufre’ye mensûblardır.
Sitemizde detaylı hızlı ve kolay arama ekranı