Kamus-ı Muhit - اليمامة maddesi

اَلْيَمَامَةُ [el-yemâmet] ve

اَلْيَمَامُ [el-yemâm] (yâ’ların fethiyle) Kasd ve ʹamd maʹnâsınadır. Ve

يَمَامَةُ [Yemâmet] Zerḵâ΄ ile mülakkaba şol kızın ismidir ki üç günlük mesâfede olan nesneyi görür idi; gözü gök olduğundan زَرْقَاءُ [Zerḵâ΄] ıtlâk olunmuştu: “أَبْصَرُ مِنْ زَرْقَاءَ” meselinin menşe΄idir. Ve

يَمَامَةُ [Yemâmet] Cevv dedikleri ülkenin ismidir ki Medîne ile Mekke’nin şarkî vasatından Baṡra ve Kûfe’ye on altı merhaleye dek arzdan ʹibârettir; mezbûreye mensûb ve ismiyle müsemmâdır. Ülke-i mezbûr arz-ı Ḩicâz’ın sâ΄irlerinden ezyed ve ekser hurmâlıkları müştemildir. Ve Museylimetu’l-Kežžâb orada daʹvâ-yı nübüvvet eyledi. Nisbetinde يَمَامِيٌّ [Yemâmiyy] denir. Ve

يَمَامٌ [yemâm] ve

يَمَامَةٌ [yemâmet] Ön cihete denir, أَمَامٌ [emâm] maʹnâsına; tekûlu: إِمْضِ يَمَامِي وَيَمَامَتِي أَيْ أَمَامِي Zâhiren bunlarda dahi yâ΄ hemzeden mübeddeledir.

Vankulu Lugatı - اليمامة maddesi

اَلْيَمَامَةُ [el-yemâmet] Vâhidi, yaban güvercinlerinin birisi maʹnâsına. Ve Kisâ΄î eyitti: يَمَامَةٌ [yemâmet] evlere me΄lûf olan güvercine derler. Ve

يَمَامَةُ [Yemâmet] Şol gök gözlü câriyenin ismidir ki atlıyı üç günlük yerden görürdü; yukâlu: “أَبْصَرُ مِنْ زَرَقْاءِ الْيَمَامَةِ” Ve

يَمَامَةُ [Yemâmet] Bir niçe şehrin dahi ismidir ki onların ismi Cevv’dir. Pes zikr olunan câriyenin ismiyle tesmiye olunmuştur, Yemâme’ye ekser evkâtta izâfet olunup جَوُّ الْيَمَامَةِ dediklerinden ötürü.