Kamus-ı Muhit - عرفات maddesi

عَرَفَاتٌ [ʹArafât] (fetehâtla) Huccâcın yevm-i ʹarefede vukûf ettikleri mevkifin ismidir; Mekke’ye on iki mîl mesâfedir. Cevherî vehminden nâşî Minâ’da bir mevziʹdir diye sebt eylemiştir.

Vankulu Lugatı - عرفات maddesi

عَرَفَاتٌ [ʹArefât] (fethateynle) Bir mevziʹin ismidir. Ve bu cemʹ sîgası üzere bir ismdir, cemʹ olunmaz. Ve Ferrâ eyitti: Bunun sıhhat üzere vâhîdi dahi yoktur. Ve ʹArabların نَزَلْنَا بِعَرَفَةَ dedikleri kelâm müvellede şebîhtir, ʹArabî-i mahz değildir. Ve bu مَعْرِفَةٌ [maʹrifet]tir, her çend cemʹ ise dahi zîrâ emâkîn zâ΄il olmadığı sebebden şey΄-i vâhid mesâbesinde olmuştur, pes زَيْدِينَ kelimesine muhâlif olur ki Zeydlerin her biri kâbil-i zevâldir; tekûlu: هَؤُلَاءِ عَرَفَاتٌ حَسَنَةً تَنْصِبُ النَّعْتَ لِأَنَّهُ نَكِرَةٌ Yaʹnî عَرَفَاتٌ merfûʹ iken ve حَسَنَةً hakîkatte naʹt iken iʹrâbda tâbiʹ kılmazlar, muvâfakat bulunmadığı için. Ve عَرَفَاتٌ [ʹarefât] munsarıftır; kâlallâhu taʹâlâ: ﴿فَإِذَا أَفَضْتُمْ مِنْ عَرَفَاتٍ﴾ (البقرة، 198) Aḣfeş eyitti: mezbûre munsarıf oldu zîrâ onun âhirinde olan tâ مُسْلِمُونَ [muslimûn]un ve مُسْلِمِينَ [muslimîn]in âhirinde olan vâv’la yâ’ya şebîhtir, zîrâ bunlar elifle tâ’yla olan cemʹin tezkîridir, pes tenvîn hâli üzere terk olundu. مُسْلِمُونَ [muslimûn]da nûn hâli üzere terk olunduğu gibi. Ve أَذْرِعَاتٌ [Ežriʹât] ve عَانَاتٌ [ʹÂnât] ve عُرَيْتِنَاتٌ [ʹUreytinât] dahi böyledir ve bunlar birer yerin ismidir.