Kamus-ı Muhit - كلالة maddesi

اَلْكَلَالَةُ [el-kelâlet] (سَحَابَةٌ [seḩâbet] vezninde) Masdardır ki zikr olundu. Ve

كَلَالَةٌ [kelâlet] Vâlidi ve veledi olmayan kişiye denir ki tesmiye bi’l-masdardır. Ve nesebi ulaşık ve peyvend olmayan karîbe denir, meselâ هُوَ ابْنُ عَمِّ الْكَلَالَةِ derler, öz ʹamuca-zâdesi olmayıp pederi tarafından ʹaşîreti veledi olsa; niteki bunun mukâbilinde إِبْنُ عَمِّهِ لَحًّا derler lâsıku’n-neseb maʹnâsına ki öz ʹamm-zâdesi olur, pes buna göre baʹîd olan ʹasabe dahi كَلَالَةٌ [kelâlet] olur. Ve ʹinde’l-baʹz كَلَالَةٌ [kelâlet] تَكَلَّلَ النَّسَبُ kavlinden me΄hûzdur ki ihâta maʹnâsınadır, yaʹnî nesebi nesebini ihâta edendir, ʹamm-zâde makûlesi gibi. Ve ʹalâ-kavlin كَلَالَةٌ [kelâlet] li-umm kardeşlerdir, إِخْوَةٌ لِأُمٍّ maʹnâsına yâhûd baʹîd olan ʹamm-zâdelerdir yâhûd vâlid ve veledden gayrı olan akribâlardır yâhûd ʹasabeden şol kimsedir ki onunla bilece li-umm kardeşler vâris olalar, pes vech-i mezkûr üzere yedi gûne tefsîr olunmuştur; yukâlu: وَرِثَهُ كَلَالَةً وَهُوَ الرَّجُلُ الَّذِي لَا وَالِدَ لَهُ وَلَا وَلَدَ وَمَا لَمْ يَكُنْ مِنَ النَّسَبِ لَحًّا أَوْ مَنْ تَكَلَّلَ نَسَبُهُ بِنَسَبِكَ كَابْنِ الْعَمِّ وَشِبْهِهِ أَوْ هِيَ الْإِخْوَةُ لِأُمٍّ أَوْ بَنُو الْعَمِّ الْأَبَاعِدِ أَوْ مَا خَلَا الْوَالِدِ وَالْوَلَدِ أَوْ هِيَ مِنَ الْعَصَبَةِ مَنْ وَرِثَ مَعَهُ الْإِخْوَةُ لِلْأُمِّ

Vankulu Lugatı - كلالة maddesi

اَلْكَلَالَةُ [el-kelâlet] (kâf’ın fethiyle ve lâm’ın tahfîfiyle) Bu maʹnâdan me΄hûzdur, yaʹnî bî-veled maʹnâsından me΄hûzdur; yukâlu: كَلَّ الرَّجُلُ يَكِلُّ كَلَالَةً مِنَ الْبَابِ الثَّانِي Ve ʹArab tâ΄ifesi لَمْ يَرِثْهُ كَلَالَةَ der, “Onu hâricden tasarruf etmedi, belki kurble ve istihkâkla tasarruf etti” maʹnâsına. Ve İbnu’l-Aʹrâbî eyitti: كَلَالَةٌ [kelâlet] ıraktan olan ʹamm oğullarıdır. Ve bir aʹrâbîden hikâyet olunmuştur ki مَالِي كَثِيرٌ وَيَرِثُنِي كَلَالَةٌ مُتَرَاخٍ نَسَبُهُمْ demiş. Ve baʹzılar eyitti: كَلَالَةٌ [kelâlet] تَكَلَّلَهُ النَّسَبُ den me΄hûzdur, تَطَرَّفَهُ maʹnâsına, gûyâ ki veled ve vâlid karâbetinin iki cânibin ahz etti, yaʹnî onların birinden olmadı, pes كَلَالَةٌ [kelâlet] masdarla tesmiye olunmuştur. Ve ʹArab tâ΄ifesi هُوَ ابْنُ عَمِّ الْكَلَالَةِ وَابْنُ عَمٍّ كَلَالَةٍ derler, kaçan لَحٌّ [laḩḩ] yaʹnî nesebi ulaşık olmasa, belki ʹaşîretinden irisi olsa.Ve

كَلَالَةٌ [kelâlet] Yorulmağa dahi derler.