اَلْأَبْلَقُ الْفَرْدُ [el-Eblaḵu’l-Ferd] Arz-ı Teymâ’da bir hısn adıdır ki vefâ-yı ʹahd ü peymânda darb-ı mesel olan Semev΄el b. ʹÂdiyâʹ nâm Yahûdî makarrıdır. Pederi ʹÂdiyâ’nın ʹalâ-kavlin Hazret-i Süleymân’ın binâ-kerdesidir. Ḩîre melikesi Zebbâ΄ hısn-ı mezbûru ve semtinde olan Mârid nâm kalʹayı feth ve teshîre saʹy-ı kesîr edip lâkin bir vechile zafer-yâb olmadı. Bi’l-âhere “تَمَرَّدَ مَارِدٌ وَعَزَّ الْأَبْلَقُ” diyerek haybet ve hüsrânla ʹavdet eyledi. Mü΄ellif burada قَصَدَهُ الزِّبَاءُ ʹunvânında fiʹli müzekker olarak îrâd eylemekle şârih der ki mü΄ennes-i hakîkîye müsned olan fiʹlin fâʹiliyle mâ-beyni fasl olunduğu mahalde tezkîr ve te΄nîsi câ΄izdir, niteki جَاءَ الْقَاضِيَ إِمْرَأًةٌ ve جَاءَتِ الْقَاضِيَ امْرَأَةٌ terkîbleri câ΄izdir.
Sitemizde detaylı hızlı ve kolay arama ekranı