اَلزِّنْفِيلَجَةُ [ez-zinfîlecet] (zâ’nın kesri ve lâm’ın fethiyle) ve
اَلزِّنْفَالَجَةُ [ez-zinfâlecet] (yâ’yı elife kalble) ve
اَلزَّنْفَلِيجَةُ [ez-zenfelîcet] (قَسْطَبِيلَةٌ [ḵasṯabîlet] vezninde) كِنْفٌ [kinf] dedikleri zarfa şebîh bir zarf adıdır. Ve كِنْفٌ [kinf] kâf’ın kesriyle içine hurdevât vazʹ olunan torba ve dağarcık makûlesi zarftır. Ve lafz-ı mezbûr zeyn-bîle-i Fârisî muʹarrebidir. Müfredât-ı Fârisîde zeyn-bîle ki tahfîfle zenbîle dahi derler, mihaffe tarzında ağaçtan düzülmüş bir çift zarf ile müfesserdir ki içine meyve ve sebzevât makûlesi koyup davara yükletirler. Ve bir nevʹi vardır ki hasırdan ve kıldan nesc eder, onu bâgçevânlar kullanırlar. Bu cihetle hâlen üzümcülerin ve bâgçevânların dâbbe üzere nesne taşıdıkları çifte sepetlere de ıtlâk olunur. Ve zeyn-bîle bâ-yı ʹArabî ve Fârisiyle vasf-ı terkîbîdir. Aslı bîle-i zeyn idi ki eyer torbası demektir. Evâ΄ilde at kısmına tahmîl eylediklerinden eyere tahsîs olunup baʹdehu devâbb-ı sâ΄ireye de tahmîl eylediler. Ve زِنْفِيلَجَةٌ [zinfîlecet] ondan muʹarrebdir. Baʹdehu tasarrufla زِنْفَالَجَةٌ [zinfâlecet] ve زَنْفَلِيجَةٌ [zenfelîcet] dahi dediler. Muzhir’in beyânına göre veznleri finʹîlele ve finʹâlele ve fenʹalîledir.
Sitemizde detaylı hızlı ve kolay arama ekranı