Kamus-ı Muhit - الشهر maddesi

اَلشَّهْرُ [eş-şehr] (قَهْرٌ [ḵahr] vezninde) Bir şey΄i şöhretlendirmek maʹnâsınadır; yukâlu: شَهَرَهُ شَهْرًا مِنَ الْبَابِ الثَّالِثِ إِذَا أَظْهَرَهُ فِي شُنْعَةٍ Lâkin mü΄ellif Baṡâ΄ir’de taʹmîm eylemiştir. Ve

شَهْرٌ [şehr] Ehl-i ʹilm ve dânişmende ıtlâk olunur; bi-maʹnâ mefʹûldür; yukâlu: رَجُلٌ شَهْرٌ أَيْ عَالِمٌ Ve tırnak kesintisi şeklinde olan şey΄e ıtlâk olunur; maʹnâ-yı âtîden taʹmîm olunmuştur. Ve yeni aya ıtlâk olunur, şöhretine mebnî; yukâlu: طَلَعَ الشَّهْرُ أَيِ الْهِلاَلُ Ve aya ıtlâk olunur, ʹumûm ʹalâkasıyla قَمَرٌ [ḵamer] maʹnâsına, ʹalâ-kavlin tamâm vâzıh ve ʹayân olup bedr-i kâmil olmağa mütekarrib oldukta ıtlâk olunur. Ve eyyâmdan ʹaded-i maʹrûfa ıtlâk olunur, kamer ile meşhûr olduğu için; murâd on iki cüz΄ iʹtibar olunan bir senenin bir cüz΄ü olacaktır ki kamer yirmi sekiz menâzili katʹ eylediği eyyâmdan ʹibârettir, gâh otuz ve gâh yirmi dokuz gün olur, Türkîde dahi bir ay taʹbîr olunur. Cemʹi أَشْهُرٌ [eşhur] ve شُهُورٌ [şuhûr] gelir. Ve

شَهْرٌ [şehr] Kezâlik masdar olur, nâs üzere kılıç sıyırıp sell-i seyf eylemek maʹnâsına; yukâlu: شَهَرَ سَيْفَهُ شَهْرًا مِنَ الْبَابِ الثَّالِثِ إِذَا انْتَضَاهُ فَرَفَعَهُ عَلَى النَّاسِ Ve

شَهْرٌ [Şehr] Esâmîdendir: Şehr b. Ḩavşeb muhaddis ve metrûkü’r-rivâyettir.

Vankulu Lugatı - الشهر maddesi

اَلشَّهْرُ [eş-şehr] (şîn’in fethi ile) Bir ay maʹnâsına. Ve meşhûr kılmağa dahi derler; yukâlu: شَهَرْتُ الْأَمْرَ أَشْهَرُهُ شَهْرًا مِنَ الْبَابِ الثَّالِثِ أَيْ جَعَلْتُهُ مَشْهُورًا Ve kılıç sıyırmağa da derler; yukâlu: شَهَرَ سَيْفَهُ يَشْهَرُهُ شَهْرًا أَيْ سَلَّهُ