اَلْعَظَمَةُ [el-ʹażamet] (fetehâtla) ve
اَلْعُظَّامَةُ [el-ʹużżâmet] (رُمَّانَةٌ [rummânet] vezninde) ve
اَلْعَظَمُوتُ [el-ʹażamût] (جَبَرُوتٌ [ceberût] vezninde) Sîga-i mübâlagalardır, kibr ve nahvet ve zehv maʹnâsınadır; lâkin ʹazamet-i Bârî-i Žü’l-Celâl vasf-ı mezkûr ile sıfatlanmak câ΄iz değildir. Ve bununla kaçan ʹibâddan birisi vasflansa hakkında kadh ve zemîmedir, zîra murâd kibr ve tecebbürdür ki sıfât-ı şeytâniyyedendir ve ammâ ʹazamet-i Rabbânî keyf ve hadd ve temsîl havsalasına güncîde değildir, hemân ʹazîm olduğunu iʹtikâd eylemek vâcibdir. وَاللهُ هُوَ الْعَظِيمُ وَلَهُ الْكِبْرِيَاءُ Ve
عَظَمَةُ اللِّسَانِ [ʹażametu’l-lisân] Dilin kalın olan yerinden ʹibârettir ki ilerisidir. Ve
عَظَمَةُ السَّاعِدِ [ʹażametu’s-sâʹid] Pazının dirsek yanında balık eti olan kaba yerinden ʹibârettir; zîrâ سَاعِدٌ [sâʹid] iki mikdârdır, biri dirsek yanıdır ki balık eti ve sinirli et olan yeridir ve birisi el ayasının ötesidir ki ona أَسَلَةٌ [eselet] derler.
Sitemizde detaylı hızlı ve kolay arama ekranı