Kamus-ı Muhit - حلف المطيبين maddesi

حِلْفُ الْمُطَيَّبِينَ [ḩilfu’l-muṯayyebîn] (ḩâ’nın kesriyle) مُطَيَّبٌ [muṯayyeb]lerin ʹahd ve mîsâkı demektir. Peygamber-i enâm ʹaleyhi’s-selâm hazretleri yirmi beş yaşında iken baʹzı kabâ΄il-i ʹArab beynlerinde münʹakid olan ʹahd ü yemîn olacaktır. Sûreti budur ki Benû ʹAbdumenâf bi’l-ittifâk Benu’d-Dâr’ın zabt ve tevliyetlerinde olan Kaʹbe-i mükerreme’nin حِجَابَةٌ [ḩicâbet] ve رِفَادَةٌ [rifâdet] ve لِوَاءٌ [livâ΄] ve سِقَايَةٌ [siḵâyet] mansıblarını almak murâd eylediklerinde Benû ʹAbduddâr imtinâʹ eylemeleriyle min-baʹd her kavm îfâ-yı hakk-ı ʹasabiyyetle birbirlerine yârî ve muʹâvenet eylemek üzere ʹahd ü yemîn eylediler. Benû ʹAbdumenâf ecnâs-ı tîbi cemʹ ve tahmîr edip bir büyük çanak içre vazʹ ve taraf-dârlarıyla ki beş kabîle ehlidir, ellerini ona gams ederek ʹakd-i ʹahd ü yemîn eyledikten sonra li-ecli’t-te΄kîd ellerini dîvâr-ı Kaʹbe’ye mesh eylediler. Binâ΄enʹaleyh مُطَيَّبِينَ [Muṯayyebîn] ile tesmiye olundular. Benû ʹAbduddâr dahi kendi hulefâlarıyla ki altı kabîleden ʹibârettir, âher-gûne mü΄ekked ʹakd-i kasem eylediler. Bu sebeble أَحْلاَفٌ [Aḩlâf] tesmiye olundular. Resûl-i ekrem ʹaleyhi’s-selâm hazretleri Mutayyebîn tarafında bulunmuşlar idi. حِجَابَةٌ [ḩicâbet]ten mûrâd Kaʹbe’nin kapıcılığıdır ve رِفَادَةٌ [rifâdet] Ḵureyş ahâlîsi miyânelerinden bir mikdâr mâl ifrâz edip onunla zebîb ve buğday ahz ederler idi, tâ ki huccâc için hâzır buluna. Ve لِوَاءٌ [livâ΄] Kaʹbe’nin sancağını tertîb eylemektir. Ve سِقَايَةٌ [siḵâyet] huccâca su vermektir.