Kamus-ı Muhit - أبو رغال maddesi

أَبُو رِغَالُ [Ebû Riġâl] (كِتَابٌ [kitâb] vezninde) Šemûd kavminden Šaḵîf kabîlesinin cedd-i aʹlâları olan kimsedir. Sunen-i Ebî Dâvûd ve Delâ΄ilu’n-Nubuvve ve sâ΄ir kütüb-i ehâdîste İbn ʹÖmer radıyallâhu ʹanhumâ hazretlerinden mervî olarak bu vetîre üzere müsebbettir ki Resûl-i ekrem sallallâhu ʹaleyhi ve sellem hazretleriyle Ṯâ΄if gazâsına hurûc ve ʹazîmetimiz hılâlinde reh-güzârımızda bir kabr zuhûr eylemekle Fahr-i ʹâlem hazretleri buyurdular ki işbu kabr kabîle-i Šaḵîf’in ceddi olan Ebû Riġâl’indir. Mersûm Šemûd kavminden olup ve işbu harem-i şerîfte mütemekkin olarak ʹurûz eden ʹavârız ve ekdârı ondan defʹ eder idi. Vaktâ ki harem-i şerîften hurûc eyledikte taraf-ı rabbânîden kavmine isâbet eden kahr ve nıkmet burada mezbûra dahi isâbet eylemekle helâk ve burada defn olundu. Pes Cevherî’nin Ebû Riġâl şol kimse idi ki beyt-i şerîfi hedm kasdıyla vürûd eden Ḩabeşe tâ΄ifesine delîl olup yolda helâk olmuştu demesi gayr-i ceyyiddir. Kezâlik İbn Sîde’nin Ebû Riġâl, Şuʹayb peygamber ʹaleyhi’s-selâm hazretlerinin ʹabdi olup ʹöşr-i emvâl tahsîline muʹayyen ve zâlim ve câbir idi, bu mahalde helâk ve medfûn oldu dediği nâ-be-mahaldir. Mütercim der ki muʹteddün-bihâ olan kütüb-i siyerde Cevherî’nin kavli mersûmdur, hattâ kendisiyle bilece bir nihâl-i zerrîn defn olunmuş idi, nebş olunsa bulunmak melhûzdur buyurmalarıyla fi’l-hâl nebş ve ihrâc eylediler.