إِدْرِيسُ [İdrîs] (hemzenin kesriyle) Bir peygamber-i zî-şândır ʹalâ-nebiyyinâ ve ʹaleyhi’s-selâm. Ve bu ekser-i nâsın tevehhüm eyledikleri gibi دِرَاسَةٌ [dirâset]ten müştak değildir, zîrâ lafz-ı mezbûr aʹcemîdir. Ve ismi خَنُوخُ [Ḣanûḣ]tur, صَبُورٌ [ṡabûr] vezninde yâhûd أُخْنُوحُ [Uḣnûḩ]tur hemze-i mazmûme ile.
إِدْرِيسُ [İdrîs] Esmâ-i ricâldendir. Ve İdrîs nebîye salavâtullâhi ʹalâ-nebiyyinâ ve ʹaleyhi İdrîs dedikleri, kitâbullâhı çok dirâset ettiği için idi. Asl adı أُخْنُوخُ [Uḣnûḣ]tur elifin ve nûn’un zammıyla ve ḣâ΄eyn-i muʹcemeteyn ile. Ve bu makâmda Cevherî’ye dahl edip إِدْرِيسُ [idrîs] lafz-ı aʹcemîdir, دَرْسٌ [ders]ten müştak olması vech değildir demişlerdir velâkin câ΄izdir ki إِدْرِيسُ [İdrîs] ıstılâh-ı ʹAcem üzere zikr olunan maʹnâya münâsib olup sâ΄ir fürûʹ ondan müştak ola, جَوْرَبَهُ [cevrebehu] ve تَجَوْرَبَهُ [tecevrebehu] جَوْرَبٌ [cevreb]den müştak olduğu gibi, جَوْرَبٌ [cevreb] muʹarreb iken. Pes إِدْرِيسُ [idrîs]e إِدْرِيسُ [idrîs] dedikleri lisân-ı ʹAcem üzere mefhûm دَرْسٌ [ders] onda bulunduğu için olur, دَرْسٌ [ders] ve دِرَاسَةٌ [dirâset] ve مُدَارَسَةٌ [mudâreset] ondan müştak olup lisân-ı ʹAraba mahsûs olduğu zarar etmez.
Sitemizde detaylı hızlı ve kolay arama ekranı