Kamus-ı Muhit - أم حبين maddesi

حُبَيْنَةُ [ḩubeynet] (جُهَيْنَةُ [cuheynet] vezninde) ve

أُمُّ حُبَيْنٍ [ummu ḩubeyn] (زُبَيْرٌ [zubeyr] vezninde) Bir cins cânvere denir, Türkîde kertenkele dedikleridir ki kelere şebîh ve iri ve karnı büyük olur; dâ΄imâ başını yukarı kaldırarak gider, taşlık yerlerde ve makberelerde kesîr olur. Ve أُمُّ حُبَيْنٍ [ummu ḩubeyn] lafzı maʹrifedir, baʹzen lâm-ı taʹrîf dâhil olur, lâkin baʹde’l-hazf şâzz olmak üzere nekre olmaz.

Vankulu Lugatı - أم حبين maddesi

أُمُّ حُبَيْنٍ [ummu ḩubeyn] (ḩâ’nın zammı ve bâ’nın fethi ve yâ’nın sükûnuyla) Bir cins cânverdir ve o kertenkeledir demişler, nitekim Muhežžebu’l-Esmâ’da işâret olunmuştur. Ve bu maʹrifedir, إِبْنُ عُرْسٍ [ibnu ʹurs] ve أُسَامَةُ [usâmet] ve اِبْنُ آوَى [ibnu âvâ] ve سَامُّ أَبْرَصَ [sâmmu ebraṡ] ve اِبْنُ قِتْرَةَ [ibnu ḵitret] gibi, lâkin bunun taʹrîfi taʹrîf-i cinstir, yaʹnî ʹalem-i mâhiyyettir. Ve gâh olur أُمُّ حُبَيْنٍ [ummu ḩubeyn]in evveline lâm-ı taʹrîf dâhil kılınıp أُمُّ الْحُبَيْنِ [ummu’l-ḩubeyn] derler ve lâkin baʹde’l-hazf nekire olmaz. Ve ammâ اِبْنُ مَخَاضٍ [ibnu meḣâḋ] ve اِبْنُ لَبُونٍ [ibnu lebûn] bunlar nekirelerdir, lâm-ı taʹrîf ile maʹrife olurlar. Ve إِبْنُ عُرْسٍ [ibnu ʹurs] gelincik ve أُسَامَةُ [usâmet] arslan ve اِبْنُ آوَى [ibnu âvâ] çakal ve سَامُّ أَبْرَصُ [sâmmu ebraṡ] kertenkele ve اِبْنُ قِتْرَةَ [ibnu ḵitret] ḵâf’ın kesriyle bir cins hurde yılan maʹnâsınadır.