Mü΄ellif burada حَجَرٌ [ḩacer]i صَخْرَةٌ [ṡaḣret] ile tefsîr eylemiştir ki tefsîr bi’l-ahasstır, zîrâ صَخْرَةٌ [ṡaḣret] hacer-i ʹazîme denir ki kaya taʹbîr olunur. Ve Baṡâ΄ir’de maʹrûf cevher-i sulb ile beyân eylemiştir. Ve
حَجَرٌ [ḩacer] Maʹdenden çıkıp henüz zevb ve siyâgat olunmamış gümüşe ve altına ıtlâk olunur. حَجَرَانِ [ḩacerân] altın ile gümüştür. Ve
حَجَرٌ [ḩacer] Kuma ıtlâk olunur, رَمْلٌ [reml] gibi. Ve
اَلْحَجَرُالْأَسْوَدُ [el-ḩaceru’l-esvedu] Kaʹbe-i muʹazzama cidârında maʹrûf seng-i esʹaddır, kemâline mebnî yalnız حَجَرٌ [ḩacer] dahi ıtlâk olunur. Ve
حَجَرٌ [Ḩacer] Endelüs’te bir şehr-i ʹazîm ismidir ki bir cebel üzerinde vâkiʹdir; muhaddisînden Muḩammed b. Yaḩyâ el-Ḩacerî oradandır. Ve bir başka mevziʹ adıdır. Ve
حَجَرُالذَّهَبِ [Ḩaceru’ž-Žeheb] Dimaşḵ’ta bir mahalle adıdır. Ve
حَجَرُشُغْلاَنَ [Ḩaceru Şuġlâne] (şîn-i muʹcemenin fethiyle) Antâkiyye kurbünde bir hısn adıdır. Ve
حَجَرٌ [ḩacer] Âfet ve dâhiyeye ıtlâk olunur; yukâlu: رُمِيَ بِحَجَرِ الْأَرْضِ أَيْ بِدَاهِيَةٍ Ve ashâbdan Evs hazretlerinin pederi ismidir. Ve şuʹarâ-yı Câhiliyye’den dîger Evs nâm kimsenin pederi adıdır. Ve muhaddisînden Enes cenâbının pederi ismidir, ʹalâ-kavlin bu iki كَتِفٌ [ketif] veznindedir. Ve Eyyûb b. Ḩacer ve Muḩammed b. Yaḩyâ b. Ebî Ḩacer hadîs rivâyet eylediler.
Sitemizde detaylı hızlı ve kolay arama ekranı