Kamus-ı Muhit - الرفرف maddesi

اَلرَّفْرَفُ [er-refref] (كَبْكَبٌ [kebkeb] vezninde) Bu dahi rafa denir, رَفٌّ [reff] gibi. Ve şol yeşil siyâba denir ki ondan perdeler ve döşemeler ittihâz olunur, murâd nihâlîler olacaktır. Mü΄ellifin Baṡâ΄ir’de beyânına göre müfredi رَفْرَفَةٌ [refrefet]tir. Ve baʹzılar ʹindinde رَفْرَفٌ [refref] müfreddir. Ve minhu kuri΄e kavluhu taʹâlâ: “عَلَى رَفَارِفَ خُضْرٍ” Ve

رَفْرَفٌ [refref] Kıl çadırın şukkasına denir. Ve zırhın aşağıya sarkan eteklerine ve uçlarına denir. Ve ağacın aşağıya salınan şâhlarına denir. Ve firâşların ve perde ve nihâlîlerin fazlalarına denir ki döşendikte saçak yerine gelen artık yerleridir. Ve döşeklere ve minderlere denir. Ve her şey΄in kenârlarından fazla kalıp bükülen ve kıvrılan yerlerine denir. Ve bir cins semek-i bahrî adıdır. Ve Yemen’e mahsûs bir şecer adıdır. Ve pencereye denir, رَوْشَنٌ [revşen] maʹnâsına. Ve yastığa denir. Ve fercde dılak dedikleri lahm-ı zâ΄ide denir. Ve dalları bîd-i mecnûn gibi aşağı sarkık olan ter ve latîf ve nâzük ağaca denir. Ve merg-zâra ve çemen-zârlara denir. Ve döşemelere denir, بُسْطٌ [busṯ] maʹnâsına. Ve sâyebân ve oba taʹbîr olunan çadırın tınâblarına ve eteklerine denir ki sonradan geçirilir. Ve ince ve nâzük dîbâ kumâşa denir. Ve başa giyilen tolganın ser-penâh muharrefi serpenek dedikleri eteğine denir ki peçe tarzında olup tolga giyildikte orası boyuna gelir.

Vankulu Lugatı - الرفرف maddesi

اَلرَّفْرَفُ [er-refref] (râ’ların fethiyle جَعْفَر [caʹfer] vezni üzere) Şol yeşil kumaştır ki ondan mahbesler yaʹnî perdeler ittihâz olunur. Ve

رَفْرَفٌ [refref] Çadırın yere karîb olan cânibleri ve dirʹin dahi aşağı sarkan cânibleridir.