Kamus-ı Muhit - السنمار maddesi

اَلسِّنِمَّارُ [es-sinimmâr] (sîn’in ve nûn’un kesri ve mîm’in teşdîdiyle) Aya denir, kamer maʹnâsına. Ve geceler aslâ uyumaz olan adama denir. Ve uğruya ıtlâk olunur. Ve bir iskâf yaʹnî fi’l-asl kefş-ger olan bir miʹmâr adıdır ki mülûk-i ʹIrâḵ’tan Nuʹmân b. İmru΄ulḵays için zahr-ı Kûfe’de garâ΄ibden olarak bir kasr-ı ʹacîbü’t-tarh binâ eylemiştir, baʹde’l-itmâm melik-i müşârünileyh gelip temâşâ eyledikte şâyed selâtîn-i sâ΄ire tarafına gidip onlara da bu resme kasr binâ eder mülâhazasıyla bîçâre miʹmârı küngüre-i bâmdan aşağıya ilkâ eyledi. ʹAlâ-kavlin Sinimmâr, Uḩayḩa b. el-Ḩallâc nâm kimsenin gulâmı olup Uḩayḩa için hânesi havâlîsinde kule taʹbîr olunur bir hısn-ı garîb binâ edip baʹde’l-ikmâl metânet ve letâfetini be-gâyet istihsân ve nüvâziş ve ihsân eyledikte “Ben bu binâda bir sanʹat-ı garîbe icrâ yaʹnî bir taşı mecmûʹ-ı binâya kilîd eyledim. Eğer o taş yerinden nezʹ olunursa cümle-i hisâr elbette münhedim olur” deyip baʹde’l-istifsâr o taşı irâ΄et eyledikte, şâyed bana bir gayz ve gadr edeceği tutup yâhûd bir takrîble âher bir kimseye irâ΄etle bâ΄is-i berbâdî-i hânümânım olur diye bâlâ-yı bâmdan ilkâ ve hakkında cezâ-yı Sinimmâr icrâ eyledi. Bir adama hizmeti yâhûd bir cemîlesi mukâbilinde gadr ve isâ΄et edenler hakkında darb olunur.

Vankulu Lugatı - السنمار maddesi

اَلسِّنِمَّارُ [es-Sinimmâr] (kesreteynle ve mîm’in teşdîdiyle) Rûm’dan bir recülün ismidir ki Kûfe’de Ḣavernaḵ demekle maʹrûf sarâyı Nuʹmân b. İmru΄ulḵays’a o yapmış idi. Sarây tamâm olduktan sonra Nuʹmân mezbûru sarây damından aşağı bırakıp helâk etti, tâ ki bir kimseye dahi sarây-ı merkûmun mislin yapmaya. Pes tâ΄ife-i ʹArab beyninde mesel darb olunup “جَزَاءُ سِنِمَّارٍ” dediler.