Kamus-ı Muhit - الحردية maddesi

اَلْحُرْدِيُّ [el-ḩurdiyy] (كُرْدِيٌّ [kurdiyy] vezninde) ve

اَلْحُرْدِيَّةُ [el-ḩurdiyyet] (hâ’yla) Sâzlıktan örülmüş çit taʹbîr ettikleridir ki yine sâzlıktan çevrilmiş ağılın duvarı üzere bend olunur ki sakf gibi üzerine onunla örtülür. Garîbdir ki burada mü΄ellif حِيَاصَةُ الْحَظِيرَةِ الَّتِي تُشَدُّ عَلَى حَائِطِ الْقَصَبِ ʹibâretiyle sebt eylemekle kamıştan çevrilmiş ağıl duvarı üzerine bend olunan sâzlık demek olur. Şârihin tafsîline göre terceme eylediğimiz vech-i sâlif üzeredir. Lâkin mü΄ellif Baṡâ΄ir’de اَلْحُرْدِيُّ حَظِيرَةٌ مِنْ قَصَبٍ ʹibâretiyle resm eylemekle kamıştan ve sâzlıktan çevrilmiş ağıl demek olur. Kamışı birbirine ʹarzan vasl ve ihkâm ile duvar ederler ki ona çit taʹbîr ederler. Ve Miṡbâḩ’ta اَلْحُرْدِيُّ حُزْمَةٌ مِنْ قَصَبٍ تُلْقَى عَلَى خَشَبِ السَّقْفِ كَلِمَةٌ نَبَطِيَّةٌ ʹunvânıyla mersûm olmakla ağılın ve huğ taʹbîr ettikleri sâzlık evin sakflarını örttükleri sâzlık tutamı demek olur ki evvel ki tercemeye akrebdir. Baʹdehu yine Miṡbâḩ’ta وَعَنِ اللَّيْثِ أَنَّهُ يُقَالُ هُرْدِيَّةٌ قَالَ وَهِيَ قَصَبَاتٌ تُضَمُّ مَلْوِيَّةً بِطَاقَاتٍ مِنَ الْكَرْمِ يُرْسَلُ عَلَيْهَا قُضْبَانُ الْكَرْمِ ʹunvânıyla merkûm olmakla yine sâzlıktan örülmüş çit dedikleridir ki asmalara kerevit ederler. el-Hâsıl fehm-i ʹâcizânemiz üzere sâzlıktan yapılan çatı ve çardak ve kerevittir ki ağıl ve huğ sakflarına ve asmalara vazʹ ve üstüvâr ederler. Ve حُرْدِيٌّ [ḩurdiyy] lafzının cemʹi حَرَادِيٌّ [ḩarâdiyy] dir.