Kamus-ı Muhit - الرواق maddesi

اَلرِّوَاقُ [er-rivâḵ] (كِتَابٌ [kitâb] vezninde) ve

اَلرُّوَاقُ [er-ruvâḵ] (غُرَابٌ [ġurâb] vezninde) Kıl oba şeklinde ʹArab evine denir. Yâhûd ev önündeki sakfa yaʹnî papuçluk taʹbîr olunan boş yerin üzerine mebnî olan şîrvân makûlesine denir. Bu münâsebetle hâlen bu diyâr büyûtunda merdiven başlarının üzerlerinde binâ kılınan nişîmen ve şeh-nişîn misilli cây-gâhlara da ıtlâk olunur; tekûlu: رَأَيْتُهُ يَقْعُدُ فِي الرِّوَاقِ وَالرُّوَاقِ وَهُوَ بَيْتٌ كَالْفُسْطَاطِ أَوْ سَقْفٌ فِي مُقَدَّمِ الْبَيْتِ Muḵaddimetu’l-Edeb’de “mukaddemu’l-beyt, pây-gâh-ı hâne” ile müfesserdir ki evin önü yaʹnî papuçluk dedikleri yeri olacaktır. Ve رِوَاقُ الْبَيْتِ [rivâḵu’l-beyt] رَوْقٌ [revḵ] gibi ʹArab çadırlarının üst şukkasından aşağıca olan şukkasına denir. Şârih der ki Muġrib’de كِسَاءٌ مُرْسَلٌ عَلَى مُقَدَّمِ الْبَيْتِ مِنْ أَعْلاَهُ إِلَى الْأَرْضِ وَيُقَالُ رَوْقٌ الْبَيْتِ وَرِوَاقُهُ أَيْ مُقَدَّمُهُ ʹibâretiyle mersûm olmakla ona göre ʹArab evinin yukarıdan yere kadar salıverilen perdeden ve kezâlik evin papuçluk taʹbîr olunan hâlî mahallinden ʹibâret olur. Ve o perdenin verâsı başka bir hazîne çadırı gibi mahal olur. Ve hâlen Mıṡır’da Câmiʹ-i Ezher’de رِوَاقٌ [rivâḵ] dedikleri nişîmen maʹnâ-yı evveldendir. Ve رُوَاقُ الْعَيْنِ [ruvâḵu’l-ʹayn] kaşa ıtlâk olunur; yukâlu: هِيَ زَجَّاءُ وَرُوَاقُ الْعَيْنِ أَيِ الْحَاجِبُ Ve رُوَاقُ اللَّيْلِ [ruvâḵu’l-leyl] gecenin evvel ucuna ıtlâk olunur; yukâlu: رُوَاقُ اللَّيْلِ أَيْ مُقَدَّمُهُ وَجَانِبُهُ Ve رُوَاقٌ [ruvâḵ] lafzının cemʹi أَرْوِقَةٌ [erviḵat] gelir, أَشْرِبَةٌ [eşribet] gibi ve رُوقٌ [rûḵ] gelir, râ’nın zammıyla. Ve

رُوَاقٌ [ruvâḵ] Boynuzlu dişi koyuna denir, نَعْجَةٌ رَوْقَاءُ maʹnâsına. Burada baʹzı nüsha müşevveştir, sahîh olan وَمِنَ اللَّيْلِ مُقَدَّمُهُ وَجَانِبُهُ وَالنَّعْجَةُ الرَّوْقَاءُ ʹunvânında olmaktır, niteki öylece terceme olundu.

Vankulu Lugatı - الرواق maddesi

اَلرِّوَاقُ [er-rivâḵ] (râ’nın kesriyle) Şol perde ki sakftan aşağı çekilir.