بَغْدَادُ [Baġdâd] (dâleyn-i mühmeleteyn ile) ve
بَغْذَاذُ [Baġžâž] (žâleyn-i muʹcemeteyn ile ve her birini âher üzere takdîmle ki dört lügat olur) ve
بَغْدَانُ [Baġdân] (nûn’la) ve
بَغْدَيْنُ [Baġdeyn] (tesniye bünyesiyle) ve
مَغْدَانُ [Maġdân] (mîm’le ki mecmûʹu yedi sûrettir) Medînetu’s-selâm ismidir ki ʹIrâḵ’ın dârü’l-mülkü olan şehr-i behişt-âbâd olacaktır. Şârih der ki meşhûru Baġdâd’dır ki kelime-i Fârisiyyedir, بغ [baġ] sanem ismi olmakla ʹatiyye-i sanem demektir. Ve Burhân-ı Ḵâṯıʹda بَاغْ دَادْ [bâġ dâd] muhaffefi olmak üzere mersûmdur. Ve baʹzılar žâl-ı muʹceme ile بَغْذَانُ [Baġžân] ve بَغْذَيْنُ [Baġžeyn] ve مَغْذَانُ [Maġžân] ve بَغْدَامُ [Baġdâm] ve بَهْدَادُ [Behdâd] sûretlerini dahi ziyâde ile on ikiye iblâg eylemiştir. Selefte nehr-i Şaṯṯ’ın hizâsında Kuşlar Kalʹası dedikleri mahalde idi, baʹdehu Manṡûr-ı Devânikî hâlen mevcûd olan sevâdı binâ ve ism-i Dicle, Vâdi’s-Selâm olmakla şehr-i mezbûru dahi Medînetu’s-Selâm ile müsemmâ eyledi.
Sitemizde detaylı hızlı ve kolay arama ekranı