اَلسَّقَمُونِيَا [es-seḵamûniyâ] (sîn’in fethi ve yâ-i tahtiyyenin tahfîfi ve kasr ile) Bir nebât adıdır ki içinden süt gibi yelmeşik rutûbet istihrâc ve tecfîf olunur, o rutûbete dahi سَقَمُونِيَا [seḵamûniyâ] denir, Türkîde mahmûde otu ve rutûbetine mahmûde taʹbîr olunur; be-gâyet müshildir, miʹde ve ahşâya muhâlefeti müshilât-ı sâ΄ireden ekserdir, binâ΄enʹaleyh sâdece istiʹmâl olunmayıp fülfül ve zencebîl ve anason gibi eşyâ-i muʹattirât-ı muslihât ile istiʹmâl olunur. Altı şaʹîre mikdârından yirmiye kadar muslihler ile istiʹmâli mirre-i safrâyı ve eḵâṡî-i bedenden lüzûcât-ı redî΄eyi câzib ve bir cüz΄ mahmûde bir cüz΄ تُرْبُذٌ [turbuž]u tâze süt ile ʹale’r-rîk şürb karında bir dâne soğulcan komayıp bi’l-cümle ihrâc eylemekte ʹacîbü’l-eser ve mücerrebdir. Mütercim der ki Mufredât’ta سَقَمُونِيَا [seḵamûniyâ] Yûnânî olup ʹArabîsi مَحْمُودَةٌ [maḩmûdet] olmak üzere mersûmdur, hattâ pek müshil olmakla şâʹir işbu beyt-i hezl-âmîzi tefevvüh eylemiştir. “عَوَاقِبُ الصَّبْرِ فِيمَا قَالَ قَائِلُهُمْ || مَحْمُودَةٌ قُلْتْ أَخْشَى أَنْ تَخَرِّينَا”
Sitemizde detaylı hızlı ve kolay arama ekranı