Kamus-ı Muhit - جفينة maddesi

جُفَيْنَةُ [Cufeynet] (جُهَيْنَةُ [cuheynet] vezninde) Bir hammâr yaʹnî meyhâneci adamın ismidir. “عِنْدَ جُفَيْنَةَ الْخَبَرُ الْيَقِينُ” meselinin menşe΄idir. Ve bunda جُهَيْنَة demek sahîh değildir ve baʹzılar ʹindinde sahîhtir, zîrâ aslı budur ki Kilâb kabîlesinden Ḩuṡayn b. ʹAmr b. Muʹâviye b. ʹAmr, Benî Cuheyne’den Aḣnes nâm kimse ile geşt ü güzâr ederek bir mahalle nüzûl eylediler. İkisi dahi fettâk olmakla Cuhenî, Ḩuṡayn-ı Kilâbî’yi katl ve mâlını ahz eyledi. Ḩuṡayn’ın Ṡaḣre nâm kız karındaşı her mevsim-i ʹArabda karındaşına nüdbe edip girye ve zârî eder idi, ʹale’l-ʹâde bir mevsimde dahi girye ve efgân ederken Aḣnes gûş ettikte işbu “تُسَائِلُ عَنْ حُصَيْنٍ كُلَّ رَكْبٍ || وَعِنْدَ جُهَيْنَةَ الْخَبَرُ الْيَقِينُ” beytini inşâd eylemekle kelâm-ı mezbûr mesel oldu.

Vankulu Lugatı - جفينة maddesi

جُفَيْنَةُ [Cufeynet] (cîm’in zammı ve fâ’nın sükûnuyla) Bir kimsenin ismidir. Ve ʹArabların “عِنْدَ جُفَيْنَةَ الْخَبَرُ الْيَقِينُ” dedikleri kavllerinde جُفَيْنَةُ [Cufeynet] bir hamr satıcı kimsenin ismidir, İbnu’s-Sikkît rivâyeti üzere. Pes ʹArabların bu kavlinde vâkiʹ olan جُفَيْنَةُ [Cufeynet]tir, جُهَيْنَةُ [Cuheynet] değildir. Ve Ebû ʹUbeyd, Kitâb-ı Emṡâl’de eyitti: Bu Aṡmaʹî kavlidir. Ammâ İbn Hişâm el-Kelbî eyitti: Bu جُهَيْنَةُ [Cuheynet]tir. Ve bunun hikâyesi budur ki Ḩuṡayn b. ʹAmr b. Muʹâviye b. ʹAmr b. Kilâbî seyre çıktı, hâlâ ki kendi ile Cuheyne kabîlesinden bir kimse var idi ki Aḣnes derlerdi, pes mezbûr Ḩuṡayn’le husûmet edip Ḩuṡayn-i Kilâbî’yi katl edip mâlın aldıkta Ṡaḣre bint Muʹâviye ağlayıp eydür idi: “تُسَائِلُ عَنْ حُصَيْنٍ كُلَّ رَكْبٍ || وَعِنْدَ جُهَيْنَةَ الْخَبَرُ الْيَقِينُ” Ebû ʹUbeyd eyitti: İbnu’l-Kelbî bu makûle nesnelere Aṡmaʹî’den aʹlemdir dedi.