اَلْإِنْبِتَالُ [el-inbitâl] (إِنْفِعَالٌ [infiʹâl] vezninde) ve
اَلتَّبَتُّلُ [et-tebettul] (تَفَعُّلٌ [tefaʹʹul] vezninde) Kesilmek maʹnâsınadır; yukâlu: بَتَّلَهُ فَانْبَتَلَ وَتَبَتَّلَ أَيْ قَطَعَهُ فَانْقَطَعَ وَتَقَطَّعَ Ve hurmâ fidanı بَتُولٌ [betûl] olmak maʹnâsınadır, ke-mâ se-yuzkeru; yukâlu: إِنْبَتَلَتِ الْفَسِيلَةُ وَتَبَتَّلَتْ إِذَا صَارَتْ بَتُولًا Ve تَبَتُّلٌ إِلَى اللهِ [tebettul ilallâh] mâ-sivâdan kesilip vech-i ihlâsla Hakk’a teveccüh ve ʹubûdiyyet eylemek, ʹalâ-kavlin nikâh ve tezevvücü terk edip zehâdet eylemek maʹnâsınadır; yukâlu: تَبَتَّلَ إِلَى اللهِ وَبَتَّلَ إِذَا انْقَطَعَ وَأَخْلَصَ أَوْ تَرَكَ النِّكَاحَ وَزَهِدَ فِيهِ Mü΄ellif işbu âyet-i kerîmeye işâret eylemiştir: ﴿وَتَبَتَّلْ إِلَى اللهِ تَبْتِيلًا﴾ Bu âyette iḩtibâk sanʹatı vardır. Ve تَبَتَّلْ تَبَتُّلًا ve بَتِّلْ نَفْسَكَ تَبْتِيلًا sebkindedir, bi’l-külliyye dergâh-ı Hazret-i Hakk’a munkatıʹ ve müteveccih olup dâ΄imâ nefsini mâ-sivâdan katʹ ve tecrîd üzere olmağı mutazammındır. Ve تَبْتِيلٌ [tebtîl] dahi تَبَتُّلٌ [tebettul] maʹnâsına da olmakla riʹâyet-i fevâsıl ve tefennün ve dakîka-i mezkûre nüktelerine de mebnî olur. Ve bu Sîbeveyhi mezhebidir.
اَلْإِنْبِتَالُ [el-inbitâl] (hemzenin ve bâ’nın kesriyle) Munkatıʹ olmak.
Sitemizde detaylı hızlı ve kolay arama ekranı