Kamus-ı Muhit - الإنتشار maddesi

اَلْإِنْتِشَارُ [el-intişâr] (إِفْتِعَالٌ [iftiʹâl] vezninde) Bir nesne yayılıp açılmak maʹnâsınadır; yukâlu: إِنْتَشَرَ الْمَتَاعُ إِذَا انْبَسَطَ Ve bir nesne sünüp uzamak maʹnâsına müstaʹmeldir; yukâlu: إِنْتَشَرَ النَّهَارُ إِذَا طَالَ وَامْتَدَّ Ve haber fâş olmak maʹnâsına müstaʹmeldir; yukâlu: إِنْتَشرَ الْخَبَرُ إِذَا انْذَاعَ Ve perâkende olmak maʹnâsınadır; yukâlu: إِنْتَشَرَتِ الْإِبِلُ إِذَا افْتَرَقَتْ عَنْ غِرَّةٍ مِنْ رَاعِيهَا Kayd-ı mezbûr ittifâkîdir, rükn-i tefsîr değildir. Ve bir adamın âleti kıvâma gelmek maʹnâsınadır; yukâlu: إِنْتَشَرَ الرَّجُلُ إِذَا أَنْعَظَ Ve yorulmak sebebiyle gövdenin sinirleri şişip kabarmak maʹnâsınadır; yukâlu: إِنْتَشَرَ الْعَصَبُ إِذَا انْتَفَخَ Ve ağacın dalları her tarafa yayılmak maʹnâsınadır; yukâlu: إِنْتَشَرَتِ النَّخْلَةُ إِذَا انْبَسَطَ سَعَفُهَا

Vankulu Lugatı - الإنتشار maddesi

اَلْإِنْتِشَارُ [el-intişâr] (hemzenin kesriyle) Haber şâyiʹ olmağa derler; yukâlu: إِنْتَشَرَ الْخَبَرُ أَيْ ذَاعَ Ve

إِنْتِشَارٌ [intişâr] Erin âleti harekete gelmeğe de derler; yukâlu: إِنْتَشَرَ الرَّجُلُ إِذَا أَنْعَظَ Ve إِنْعَاظٌ [inʹâż] nûn’la ve ʹayn-ı mühmele ve żâ-i muʹceme ile âlet harekete gelmektir. Ve

إِنْتِشَاٌر [intişâr] Davarın siniri şişmektir. Ve bu, davar yorulup taʹab çekmeden hâsıl olur nesnedir. Ve o münteşir sinire عُجَايَةٌ [ʹucâyet] derler, ʹayn-ı mühmelenin zammıyla ve cîm’le ve yâ-i tahtânî-i müsennâtla.