Kamus-ı Muhit - الربيعة maddesi

اَلرَّبِيعَةُ [er-rebîʹat] (سَفِينَةٌ [sefînet] vezninde) Kuvvet sınamak için kaldırılan ağır taşa denir ki kuvvet taşı taʹbîr olunur; yukâlu: هَذِهِ رَبِيعَةُ الْأَشِدَّاءِ وَهِيَ حَجَرٌ يُمْتَحَنُ بِإِشَالَتِهِ الْقُوَى Ve cenkte başa giyilen demir tolgaya denir; yukâlu: لَبِسَ رَبِيعَتَهُ وَهِيَ بَيْضَةُ الْحَدِيدِ Ve ravza ve merg-zâra denir. Ve azık çantasına ve dağarcığına denir. Ve şol tablaya ve kutuya denir ki nev-ʹarûslar onun içine tîb makûlesini korlar, عَتِيدَةٌ [ʹatîdet] maʹnâsına. Ve

رَبِيعَةُ [Rebîʹat] Ṡaʹîd eyâletinde bir karye adıdır ki Benî Rebîʹa’ya mahsûstur. Ve

رَبِيعَةُ الْفَرَسِ [Rebîʹatu’l-Feres] Bir kabîlenin pederi ismidir ki İbn Nizâr b. Maʹadd b. ʹAdnân’dır, niteki “ح،م،ر” mâddesinde beyân olundu. O kabîleye nisbetinde رَبَعِيٌّ [Rebeʹiyy] denir harekâtla. Ve ʹUḵayl kabîlesinde iki kabîle vardır. Biri Rebîʹa b. ʹUḵayl’dır ki Ebu’l-Ḣuleʹâ΄dır, “خ،ل،ع” mâddesinde beyân olundu. Ve birisi Rebîʹa b. ʹÂmir b. ʹUḵayl’dır ki Ebraṡ ve Ḵuḩâfe ve ʹArʹara ve Ḵurra nâm kimselerin pederidir. Kezâlik Temîm kabîlesinde iki Rebîʹa vardır: Biri Rebîʹa el-Kubrâ’dır ki Rebîʹatu Mâlik’tir ve ona Rebîʹatu’l-Cûʹ dahi ıtlâk olunur. Ve biri Rebîʹa b. Ḩanżala b. Mâlik’tir. Ve

رَبِيعَةُ [Rebîʹat] Havâzîn kabîlesinden bir cemâʹatin pederidir ki o Rebîʹa b. ʹÂmir b. Ṡaʹṡaʹa’dır. Ve onlara Benû Mecd ıtlâk olunur. Ve Mecd, vâlidelerinin adıdır. Ve

رَبِيعَةُ [Rebîʹat] Otuz nefer ashâb-ı kirâmın ismidir.

Vankulu Lugatı - الربيعة maddesi

اَلرَّبِيعَةُ [er-rebîʹat] (râ’nın fethi ve bâ’nın kesri ve meddiyle) Kuvvet sınamak için kaldırılan taş. Ve

رَبِيعَةٌ [rebîʹat] Kezâlik demirden olan tolgaya derler, بَيْضَةُ الْحَدِيدِ maʹnâsına. Ve

رَبِيعَةُ الْفَرَسِ [Rebîʹatu’l-Feres] Bir kabîlenin babası adıdır ki o Rebîʹa b. Nizâr b. Meʹadd b. ʹAdnân’dır. Ve mezbûre رَبِيعَةُ الْفَرَسِ dediklerine bâʹis budur ki babalarından kalan mîrâsı kısmette mezkûr at aldı ve karındaşı altın aldı. Binâ΄en ʹalâ zâlik ona مُضَرُ الْحَمْرَاءِ dediler. Ve ʹUḵayl’de iki Rebîʹa vardır ki biri Rebîʹa b. ʹUḵayl ve biri Rebîʹa b. ʹÂmir’dir. Ve Temîm’de dahi iki Rebîʹa vardır, biri Rebîʹa el-Kubrâ ki o Rebîʹa b. Mâlik’tir ve biri dahi Rebîʹa-i Ṡuġrâ’dır ki o dahi Rebîʹa b. Ḩanżale b. Mâlik’tir. Ve bir Rebîʹa dahi şol Rebîʹa’dır ki Hevâzin’den bir cemâʹatin babasıdır, o Rebîʹa b. ʹÂmir b. Ṡaʹṡaʹa’dır ki onlara Benû Mecd derler, vâlidelerinin ismidir, vâlidelerine nisbet olunmuşlardır.