Kamus-ı Muhit - الإنهيار maddesi

اَلتَّهَوُّرُ [et-tehevvur] (تَفَعُّلٌ [tefaʹʹul] vezninde) ve

اَلتَّهَيُّرُ [et-teheyyur] (yâ΄î olarak) ve

اَلْإِنْهِيَارُ [el-inhiyâr] (إِنْفِعَالٌ [infiʹâl] vezninde) Binâ çöküp yıkılmak maʹnâsınadır; yukâlu:تَهَوَّرَ الْبِنَاءُ وَتَهَيَّرَ وَانْهَارَ إِذَا انْهَدَمَ Ve

تَهَوُّرٌ [tehevvur] Bir adam kıllet-i endîşe vü mübâlât sebebiyle bir işe bî-pervâ saldırmak maʹnâsınadır ki encâmı kerîheyi mûcib olur; yukâlu: تَهَوَّرَ الرَّجُلُ إِذَا وَقَعَ فِي الْأَمْرِ بِقِلَّةِ مُبَالاَتٍ Ve bir ʹillet nâsa ʹumûm üzere müstevlî olmak maʹnâsınadır; yukâlu: تَهَوَّرَ الْوَعَكُ النَّاسَ إِذَا أَخَذَهُمْ وَعَمَّهُمْ Ve gece geçip gitmek, ʹalâ-kavlin çoğu gidip azı kalmak maʹnâsınadır; yukâlu: تَهَوَّرَ اللَّيْلُ إِذَا ذَهَبَ أَوْ وَلَّى أَكْثَرُهُ Mecmûʹu sukût maʹnâsından me΄hûzdur.

Vankulu Lugatı - الإنهيار maddesi

اَلْإِنْهِيَارُ [el-inhiyâr] (hemzenin ve hâ’nın kesriyle) Kezâlik obrulmak; yukâlu: هَوَّرْتُهُ فَتَهَوَّرَ وَانْهَارَ أَيِ انْهَدَمَ Ve

تَهَوُّرٌ [tehevvur] Bir nesneye vâkiʹ olmağa dahi derler kıllet-i mübâlât sebebiyle; yukâlu: فُلَانٌ مُتَهَوِّرٌ أَيْ لَا يُبَالِي فِيمَا وَقَعَ Ve

تَهَوُّرٌ [tehevvur] Gecenin ekseri geçip zulmeti eksilmeğe de derler; yukâlu: تَهَوَّرَ اللَّيْلُ إِذَا مَضَى أَكْثَرُهُ وَانْكَسَرَ ظَلَامُهُ Ve kışın şiddeti geçip bürûdetine naks gelmeğe dahi der[ler]; yukâlu: تَهَوَّرَ الشِّتَاءُ إِذَا ذَهَبَ أَكْثَرُهُ وَانْكَسَرَ بَرْدُهُ Ve sâhib-i Ṡurâḩتَهَوُّرٌ [tehevvur]u “tûde” yaʹnî tepe ile tefsîr etmiştir, hak değildir.