Kamus-ı Muhit - الأوارجة maddesi

اَلْأَوَارِجَةُ [el-evâricet] (hemzenin fethi ve râ’nın kesriyle) Selâtîn dîvânlarına müteʹallik müfredât defterine denir. Ve bu, Fârisî evâre muʹarrebidir ki nâkil maʹnâsınadır, zîrâ encîzah taʹbîr olunan perâkende ve müteferrik defterden ki nâs üzere sâbit olan hisâb onda sebt ve kayd olunur, merkûm أَوَارِجَةٌ [evâricet] taʹbîr olunan defter-i mazbûta nakl olunur, baʹdehu cerîde-i ihrâcâta nakl olunur. Ve ber-muktezâ-yı hisâb-ı dîvânî أَوَارِجَةٌ [evâricet] müteʹaddid olur. Mütercim der ki Burhân’da evâr lafzı dîvâna müteʹallik defter-i hisâb ile ve “evâre” hâ’yla dîvânâ müteʹallik perâkende müfredât defteriyle beyân olunmuştur. أَوَارِجٌ [evâric] “evâre” muʹarrebidir, hâlen Devlet-i ʹAliyye’de rûz-nâme dedikleri olacaktır. Ve encîzah hemzenin ve žâl-ı muʹcemenin fethiyle encîde muʹarrebidir ki fi’l-asl müteferrik ve munkatıʹ maʹnâsınadır, baʹdehu perâkende müfredât defterine ıtlâk olunmuştur. Ve zikr olunan تَارِيجٌ [târîc] târîk muʹarrebidir ki ebvâbı müştemil müsveddeye denir. Hülâsa hâlâ Devlet-i ʹAliyye’de defter-dâr tarafından zimmet defteri ve ʹaskerî ve ʹulûfe-hvâr ve eshâm ve vezâ΄if ve mevkûfât ve sâ΄ir defterler encîzah olacaktır. Ve rûznâme ve baş muhâsebe makûlesinin defterleri أَوَارِجَةٌ [evâricet] olacaktır. Ve

تَارِيجٌ [târîc] Her fırkanın esâmî ve vezâ΄ifi mukayyed müsvedde defteri olacaktır; tafsîlini ehl-i kalem bilir.